حوزہ نیوز ایجنسی کی رپورٹ کے مطابق منہاج القرآن یوتھ لیگ کے زیراہتمام ڈاکٹر محمد طاہرالقادری کی 8 جلدوں پرمشتمل قرآنی انسائیکلوپیڈیا کی تقریب رونمائی سندھ اسکاؤ ٹس آڈیٹوریم میں منعقد ہوئی۔

تقریب کی صدارت تحریک منہاج القرآن انٹرنیشنل کے صدر ڈاکٹر حسین محی الدین قادری نے کی۔ ڈاکٹر فاروق ستار، ڈاکٹر معراج الہدیٰ ایم کیو ایم کے رہنماء اسلم مجاہد، رضا باقری، کلپنہ دیوی، قاضی زاہد حسین، پروفیسر خیال آفاقی، بشپ خادم بھٹو، شیخ صلاح الدین، پیر آغا فضل الرحمان مجددی، علامہ اعجاز مصطفی، مظہر محمود علوی، نعیم انصاری سمیت سیاسی، سماجی، علمی، ادبی شخصیات، اہل قلم، کالم نگار، شوبز سے تعلق رکھنے والی شخصیات سمیت علماء کرام، اسکالرز، یوتھ تنظیمات کے قائدین، مینارٹی اور خواتین نے بڑی تعداد میں تقریب میں شرکت کی۔

منہاج القرآن انٹرنیشنل کے صدر ڈاکٹر حسین محی الدین قادری نے خطاب کرتے ہوئے کہا قرآنی انسائیکلوپیڈیا موجودہ صدی کی بلند پایا تحقیق اور عظیم علمی کاوش ہے جو شیخ الاسلام ڈاکٹر محمد طاہرالقادری کی نصف صدی کے مطالعہ کا نچوڑ ہے۔ قرآن مجید اللہ کا کلام اور قیامت تک انسانیت کیلئے راہ ہدایت و نجات ہے۔ قرآنی انسائیکلوپیڈیا حقوق اللہ، حقوق العباد، عقائد ایمانیات، دین و دنیا، آخرت، قیامت کی حقیقت، قصص الانبیاء، کائنات کی حقیقت، تخلیق آدم، اخلاق اقدار، حلال و حرام، اقلیتوں کے حقوق، حیوانات سمیت دنیا کے پانچ ہزار موضوعات پر مشتمل ہے۔

انہوں نے کہا کہ یہ صرف ہر گھر کی ضرورت ہی نہیں بلکہ زندگی کے تمام شعبوں میں رہنمائی کیلئے ہر ادارے کی بھی ضرورت ہے۔ قرآنی انسائیکلوپیڈیا نے تمام شعبہ ہائے زندگی، معاشی، اقتصادی، قانونی، سائنسی، دینی، مذہبی، جدید، قدیم مسائل آسان فہم بنا دیا ہے ایک عام انسان کو قرآن کے قریب اور آسان فہم بنا دیا ہے۔ انہوں نے کہا شیخ الاسلام نے قرآنی انسائیکلوپیڈیا جیسی عظیم کتاب کی تصنیف کر کے متلاشیان علم کیلئے اس صدی کا احسان عظیم کیا ہے۔ ڈاکٹر حسین محی الدین قادری نے کہا قرآن فہمی میں انسانیت کی معراج ہے جبکہ قرآنی گریزی میں زوال ہے۔ قرآن حکیم کو قیامت تک کیلئے انسا نیت کیلئے دستور حیات اور قانون فطرت قرار دیا ہے۔

حجت الاسلام والمسلمین صلاح الدین نے کہا ڈاکٹر طاہرالقادری اتحاد بین المسالک کے عظیم ستارے ہیں، انہوں نے کہا ڈاکٹر محمد طاہرالقادری کے علمی کام کو دیکھ کر دنیا دنگ ہے ایسی علمی ادبی مفکر اللہ تعالیٰ خوش نصیب اقوام کو صدیوں بعد نعمتوں کی صورت میں عطاء فرماتا ہے۔ شیخ الاسلام نی صرف پاکستان بلکہ عالم اسلام کا فخر اور انہی نعمتوں کا تسلسل ہیں جو اللہ تعالیٰ نے عظیم اقوام کو عطا کیں۔

پروفیسر خیال آفاقی، پیر فضل الرحمان مجددی، علامہ اعجاز مصطفی نے کہا قرآنی انسائیکلوپیڈیا اتنی ضخیم ہونے کے باوجود دو ماہ کے کم عرصے میں اس کے بیس ہزار سے زائد سیٹ فروخت ہو چکے ہیں، لاکھوں کی تعداد میں ایڈوانس بکنگ موجود ہے 8 جلدوں پر مشتمل اس کتاب کی اتنی سیل بھی خود ایک تاریخ ہے۔ علم کی دنیا میں قرآنی انسائیکلوپیڈیا تاریخ ساز اضافہ ہے جو آنے والی نسلوں کو سیراب کرے گا اور نسل نو کو قرآنی تعلیمات کو سمجھنے اور زندگی میں نافذ کرنے، انتہا پسندی کے خاتمے میں اہم کردار ادا کرے گا۔