حوزہ نیوز ایجنسی کے مطابق، بنت الہدیٰ شہید بہشتی ٹاؤن بیس کی سرپرست محترمہ ابوترابی نے مشہد میں حوزہ نیوز ایجنسی کے نامہ نگار کے ساتھ خصوصی گفتگو میں اس بیس کی قرآنی سرگرمیوں اور نوجوانوں کی زندگی پر اس کے اثرات پر روشنی ڈالی۔

انہوں نے کہا: یہ بیس کئی سالوں سے ثقافتی، سماجی اور قرآنی سرگرمیوں میں مصروف ہے اور اس کا ایک اہم حصہ قرآنی پروگرام ہیں جو نوجوانوں اور جوانوں کے لیے مخصوص ہیں۔

انہوں نے اس بیس میں قرآنی سرگرمیوں کے بارے میں بتایا کہ ہم نوجوانوں کے لیے قرآنی محافل منعقد کرتے ہیں۔ جہاں انہیں قرآن کی حفظ، تلاوت، روخوانی اور تجوید سکھائی جاتی ہے۔

محترمہ ابوترابی نے کہا: ہمارے مربی، جو خود قرآن کریم کے حافظ ہیں، نوجوانوں کی مدد کرتے ہیں تاکہ وہ قرآن سے زیادہ مانوس ہوں۔ اس بیس کی بعض بچیاں پورے قرآن کو حفظ کرنے میں کامیاب ہو چکی ہیں جبکہ کچھ دیگر مختلف اجزاء کو حفظ کر رہی ہیں۔

انہوں نے ان قرآنی محافل میں شرکاء کی تعداد اور بیس کی قرآنی سرگرمیوں کی تاریخ کے بارے میں گفتگو کرتے ہوئے کہا: فی الحال تقریباً 18 لڑکیاں قرآن حفظ کی کلاسز میں شرکت کر رہی ہیں۔ یہ ادارہ تقریباً 20 سال سے قرآنی سرگرمیوں میں مصروف ہے۔ اس کے علاوہ ہمارے ہاں درمیانی عمر اور بزرگ خواتین کے لیے روخوانی، تجوید اور تعلیمی اجلاس بھی منعقد کیے جاتے ہیں اور بچوں کے لیے "مہد القرآن" بھی قائم ہے تاکہ وہ کم عمری سے ہی قرآنی مفاہیم سے آشنا ہوں۔