حوزہ نیوز ایجنسی مشہد کے مطابق، امام جمعہ مشہد آیت اللہ سید احمد علم الہدیٰ نے حسینیہ دفترِ نمایندہ ولی فقیہ خراسان رضوی میں اٹھارہویں درسِ تفسیرِ قرآن کریم میں سورہ حج کی آیت نمبر 40 کی تفسیر بیان کرتے ہوئے کہا: "الَّذِینَ أُخْرِجُوا مِنْ دِیَارِهِمْ بِغَیْرِ حَقٍّ... وَلَیَنْصُرَنَّ اللَّهُ مَنْ یَنْصُرُهُ إِنَّ اللَّهَ لَقَوِیٌّ عَزِیزٌ"، اس آیت میں سب سے پہلا نکتہ یہ ہے کہ جو خدا کی مدد کرتا ہے، خدا بھی اس کی مدد کرتا ہے۔

انہوں نے کہا: جب کوئی دینِ خدا کی مدد کے لیے میدان میں آتا ہے اور مستکبرین کے ظلم و جبر سے بندگانِ خدا کو نجات دلانے کی کوشش کرتا ہے تو جب تک وہ اس راہ پر رہے گا، خدا بھی اس کی مدد کرے گا۔

حوزہ علمیہ خراسان کی اعلیٰ کونسل کے اس رکن نے کہا: آج دنیا میں اسلام کو ٹارگٹ کیا جا رہا ہے۔ تاریخِ اسلام کے آغاز سے لے کر آج تک جتنا اس دور میں نبی اکرم صلی اللہ علیہ وآلہ وسلم پر کی ذات مبارک پر حملہ ہو رہا ہے، پہلے کبھی نہیں ہوا۔ آج دنیا کی تمام طاقتیں اسلامی فکر کے خلاف برسرِ پیکار ہیں، جن میں صفِ اول میں امریکا ہے۔

انہوں نے کہا: جو بھی عالمی نظم و نسق کا نظریہ رکھتا ہے، وہ اسلام کا دشمن ہے۔ انہوں نے سوال اٹھایا کہ کیوں دنیا کے دیگر ممالک اسرائیل کے لبنان اور غزہ کے عوام پر ڈھائے جانے والے مظالم کے خلاف کوئی قدم نہیں اٹھاتے؟ اس کا سبب یہ ہے کہ وہ اسلام کو مٹانے کے امریکی منصوبے میں شریک ہیں۔ اس لیے ان حالات میں اسلام دشمنوں کے خلاف مزاحمت کرنا ہمارا فرض ہے۔