حوزہ نیوز ایجنسی کی رپورٹ کے مطابق، استاد حوزہ علمیہ خواہران محترمہ آزادہ داودی نے مدرسہ علمیہ ریحانۃ الرسولؑ میں ’’آج کی مصروف زندگی کے لیے روحانی حل‘‘ کے موضوع پر منعقدہ نشست سے خطاب کرتے ہوئے تسبیحات حضرت زہراؑ کو توانائی اور اطمینان کا نہایت مؤثر سر چشمہ قرار دیا۔
انہوں نے رسول اکرم صلی اللہ علیہ وآلہ وسلم کی اس حدیث کی طرف اشارہ کیا جس میں آپؐ نے یہ تسبیحات اپنی دختر گرامی کو سکھائیں۔ ان کا کہنا تھا کہ یہ اذکار انسان کو جسمانی تھکن، بیماری اور بڑھتی ذمہ داریوں کے مقابل مضبوط بناتے ہیں۔ جب مادی وسائل انسان کی ضرورت پوری نہیں کر پاتے، تب روحانی توانائی ہی سب سے مؤثر سہارا ثابت ہوتی ہے۔
محترمہ آزادہ داودی نے لفظ "سبحان" کی لغوی تحقیق بیان کرتے ہوئے کہا کہ اس کا اصل معنی ’’پانی پر تیزی سے حرکت کرنا‘‘ ہے، یعنی ایک ایسا سفر جو رکاوٹوں سے بے نیاز اور سیدھا مقصود تک پہنچاتا ہے۔ سبحان اللہ کہنا درحقیقت اس ذات کامل کی طرف حرکت ہے جو ہر نقص سے پاک ہے، اور یہی روحانی حرکت انسان کو توانائی بخشتی ہے۔
انہوں نے مزید کہا کہ "الحمدللہ" صرف شکر گزاری کا اظہار نہیں، بلکہ انسان کو اللہ کی مسلسل نعمتوں کے بہاؤ سے جوڑ دیتا ہے۔ یہ ذکر توجہ کو مشکلات سے ہٹا کر رب کی عطا کردہ نعمتوں کی طرف منتقل کرتا ہے۔
تقریر کے اختتام پر انہوں نے واضح کیا کہ تسبیحات حضرت زہراؑ کے تین بنیادی ذکر—اللہ اکبر، الحمدللہ، سبحان اللہ—توحید کے بنیادی ستون اور عرشِ الٰہی کے ارکان ہیں۔ ان اذکار پر مداومت انسان کو اسی راستے پر چلاتی ہے جس پر حضرت فاطمہ زہرا سلام اللہ علیہا چلتی تھیں، اور یوں بندہ اعلیٰ روحانی مقامات تک رسائی حاصل کرتا ہے۔
آپ کا تبصرہ