حوزہ نیوز ایجنسی کی رپورٹ کے مطابق، مدیر حوزہ علمیہ خراسان حجت الاسلام والمسلمین علی خیاط نے حوزہ علمیہ خراسان کے مدارس کے مہتممین اور اراکین کے ساتھ منعقدہ اجلاس سے خطاب کرتے ہوئے موجودہ حالات میں علمی، ثقافتی اور تربیتی سرگرمیوں کے اہم مقام کی طرف اشارہ کرتے ہوئے کہا: اس وقت اور اس خاص صورت حال میں ضروری ہے کہ ہم علمی جہاد کو اپنے کام کا محور بنائیں اور جہادی روح اور مستقل کوشش کے ساتھ حوزہ علمیہ کے علمی دھارے کو، جو دیگر دھاروں کی رہنمائی کرتا ہے، مضبوط کریں کیونکہ آج حوزہ علمیہ علمی دھارے کی رہنمائی کے ساتھ ساتھ ثقافتی اور تربیتی دھارے کی رہنمائی میں بھی کردار ادا کر رہے ہیں۔
انہوں نے کہا: اہل بیت علیہم السلام کی متعدد دعاؤں میں، جن میں دعائے کمیل بھی شامل ہے، گناہوں کے اثرات کی طرف اشارہ کیا گیا ہے، جہاں حضرت امیرالمومنین علی علیہ السلام ان گناہوں کی طرف اشارہ فرماتے ہیں جو مصیبتوں کے نازل ہونے، دعاؤں کے روکے جانے اور نعمتوں کے بدلنے کا سبب بنتے ہیں۔ دیگر روایات میں جیسا کہ امام کاظم علیہ السلام سے منقول ہے، انسان کی زندگی میں پیش آنے والی بہت سی مشکلات، پریشانیاں اور مصیبتیں انہی غفلتوں اور آلودگیوں کا نتیجہ ہیں۔
حجت الاسلام والمسلمین خیاط نے گناہ اور نعمتوں کی ناشکری کے درمیان تعلق پر زور دیتے ہوئے کہا: وہی اثر جو گناہ انسان کی زندگی پر ڈالتا ہے، وہی الہی نعمتوں کی طرف عدم توجہ اور ان کی شکرگزاری میں کوتاہی کے نتیجے میں بھی ظاہر ہوتا ہے۔
انہوں نے مزید کہا: صحیفہ سجادیہ کی پہلی دعا میں امام سجاد علیہ السلام نے خوبصورتی کے ساتھ اس حقیقت کو بیان فرمایا ہے کہ الہی نعمتوں میں تصرف بغیر شکرگزاری کے، انسان کو انسانیت کے دائرے سے خارج کر دیتا ہے۔ امام جواد علیہ السلام نے بھی اسی سلسلے میں زور دیا ہے کہ الہی نعمت اس کی عظمت کے مطابق شکر کا تقاضا کرتی ہے۔
مدیر حوزہ علمیہ خراسان نے کہا: سب سے بڑی نعمت جو خداوند نے ہمیں اور آپ کو عطا فرمائی ہے، وہ خدا کے دین کی خدمت، امام زمانہ عجل اللہ تعالی فرجہ الشریف کے سپاہیوں کی خدمت اور ان لوگوں کی خدمت کی نعمت ہے جو حضرت ولی عصر (عج) کی توجہ کے مستحق ہیں۔ یہ نعمت بہت زیادہ شکرگزاری کا تقاضا کرتی ہے۔ اگرچہ اس نعمت کے ساتھ مشکلات، مشقتیں اور سختیاں برداشت کرنا بھی ہے، لیکن اس عظیم نعمت کی قدر کرنی چاہیے اور اس کا شکر اپنے فرائض کی انجام دہی، مستقل مجاہدہ اور تربیتی عہد کے ذریعے ظاہر کرنا چاہیے تاکہ خدانخواستہ ہم معصومین علیہم السلام کی تنبیہات کے مورد نہ بنیں۔
انہوں نے کہا: مومن، صالح اور لائق انسانوں کی تربیت کا عظیم کام، جو خود الہی دین کے خادم ہوں گے، بہت قیمتی کام ہے اور شاید خدمت کے تمام عنوانات میں اس سے برتر اور بلندتر خدمت کا تصور نہ ہو۔
آپ کا تبصرہ