حوزہ نیوز ایجنسی کی رپورٹ کے مطابق، ملی یکجہتی کونسل کے زیر اہتمام مختلف مذہبی جماعتوں کے سوشل میڈیا ونگز کے نمائندگان کا اہم اجلاس مرکزی رہنما ثاقب اکبر کی زیر صدارت منعقد ہوا۔مجلس وحدت مسلمین کی طرف سے اجلاس میں نمائندگی ایم ڈبلیو ایم کے مرکزی ڈپٹی سیکرٹری اطلاعات مظاہر شگری نے کی۔اجلاس سے خطاب کرتے ہوئے انہوں نے دور عصر میں سوشل میڈیا کی اہمیت و ضرورت پر زور دیا۔
انہوں نے کہا کہ ففتھ جنریشن وار کا مقابلہ کرنے کے لیے ہمیں اپنے آپ کو جدید مہارتوں سے لیس کرنا ہو گا۔اسلام دشمن قوتوں کے عزائم ناکام بنانے کے لیے انٹرنیٹ ٹیکنالوجی سے استفادہ انتہائی ضروری ہے۔انہوں نے کہا کہ ہتھیار استعمال کرنے کے لیے محض ہدف کی نشاندہی کافی نہیں بلکہ حقیقی دشمن سے آگاہی بھی ضروری ہے۔سوشل میڈیا کے ذریعے امت مسلمہ کے درمیان مذہبی منافرت پھیلانے والے وہ ناسمجھ دوست ہیں جو ہتھیار کا استعمال تو بخوبی جانتے ہیں لیکن وہ دشمن شناس نہیں۔جس کا سب سے بڑا نقصان یہ ہے کہ انہوں نے اپنے تیروں کا رُخ اپنے ہی بھائیوں کی طرف موڑ رکھا ہے اور دین اسلام کے پیروکاروں کو کمزور کر رہے ہیں۔
انہوں نے مزید کہا کہ یہود ونصاریٰ نے جو ہتھیار امت مسلمہ کو ٹکروں میں تقسیم کرنے کے لیے تیار کیا ہے ان کو ہم نے تدبر و حکمت کے ساتھ دشمن کی طرف موڑ دینا ہے۔انہوں نے کہا کہ قوم کا ہر فرد سوشل میڈیا کا مثبت استعمال کر کے اپنے حصے کاکردار احسن طریقے سے ادا کرے۔مظاہر شگری نے ملی یکجہتی کونسل کی اس کاوش کو سراہتے ہوئے امید ظاہر کی کہ مستقبل میں بھی ایسے اجلاس منعقد کیے جاتے رہیں تاکہ نوجوان نسل کی جدید خطوط پر بہترین رہنمائی ہو سکے۔
