حوزہ نیوز ایجنسی کی رپورٹ کے مطابق، فاطمیہ ایجوکیشنل کمپلیکس مظفرآباد، آزاد کشمیر میں یومِ شہادتِ امام حسن عسکری علیہ السّلام اور ایامِ عزاء کے اختتام کی مناسبت سے ایک پر سوز مجلسِ عزا منعقد ہوئی، جس سے خواہر فضہ مختار نقوی نے خطاب کیا۔
نمازِ ظہرین کے بعد مجلس کا آغاز زیارتِ عاشورہ کی تلاوت سے ہوا، جس کے بعد سوز و سلام اور نوحہ خوانی پیش کی گئی۔
خطاب کرتے ہوئے سیدہ فضہ مختار نقوی نے "امام زمانہ کی غیبت میں ہماری ذمہ داریاں" کے موضوع پر روشنی ڈالتے ہوئے کہا کہ سب سے پہلی ذمہ داری امام زمانہؑ کی حقیقی معرفت حاصل کرنا ہے۔ انہوں نے کہا کہ ہمیں اپنی زندگی میں اخلاقِ حسنہ اپنانے اور برے اخلاق سے دور رہنے کی ضرورت ہے، حلال و حرام کے احکام سیکھ کر ان پر عمل کرنا چاہیے، واجبات کی ادائیگی اور گناہوں سے اجتناب کو معمول بنانا چاہیے اور اپنی فکری و عملی اصلاح کرنی چاہیے تاکہ حقیقی پیروکار بن سکیں۔
انہوں نے مزید کہا کہ امامؑ کی سلامتی اور ظہور کی تعجیل کے لیے صدقہ دینا اور نیک اعمال انجام دینا ضروری ہے، جب کہ دعائے ندبہ، دعائے عہد اور زیارت آل یس جیسی دعاؤں کو روزمرہ زندگی کا معمول بنایا جائے۔ ان کے مطابق، ان ذمہ داریوں پر عمل کر کے ہی ہم امامؑ کے قریب ہو سکتے ہیں اور ظہور کی تیاری کر سکتے ہیں۔
آپ کا تبصرہ