حوزہ نیوز ایجنسی کی رپورٹ کے مطابق، مرکزی سیکرٹری جنرل شیعہ علماء کونسل پاکستان علامہ ڈاکٹر شبیر حسن میثمی نے حالیہ سندھ کے اندر امن و امان کی صورتحال پر تشویش کا اظہار کرتے ہوئے کہا: آئے روز دن دیہاڑے ڈاکوؤں کا شہریوں سے لوٹ مار کا سلسلہ تیزی سے جاری ہے، جس سے سندھ کی عوام شدید مشکلات کا شکار ہے۔
انہوں نے مزید کہا: حکومت کی طرف سے کوئی اقدامات بظاہر نظر نہیں آرہے ہیں جن سے ڈاکو راج کا خاتمہ ممکن ہو۔ اس سلسلے میں ضلع شکارپور کے اندر مچھر قبرستان شکارپور سٹی میں تاجروں کی لوٹ مار کے واقعات کے خلاف ایک آپریشن کیا گیا۔ جس کے نتیجے میں ڈاکوؤں کی اندھا دھند فائرنگ سے ڈی ایس پی سٹی محترمہ پارس بکھرانی اور ڈی ایس پی گڑھی یاسین، ظھور سومرو و دیگر پولیس اہلکار شدید زخمی ہوئے، شہریوں کے تحفظ کی خاطر پولیس کے اس اقدام اور بہادری پر خراج تحسین بھی پیش کرتے ہیں لیکن اس قسم کے واقعات کے خلاف بھرپور کاروائیاں عمل میں لائی جائیں اور سندھ کے عوام کی پریشانیوں کو خاتمہ کیا جائے۔
علامہ ڈاکٹر شبیر حسن میثمی نے کہا: سندھ میں امن و امان کی صورتحال ایک چیلنج بن چکی ہے، وزیر اعلی سندھ سید مراد علی شاہ، آئی جی سندھ جناب مشتاق میمن سے مطالبہ کرتے ہیں کہ ایسی پائیدار حکمت عملی اور جدید طریقوں سے آپریشنز انجام دیئے جائیں جس سے پولیس کے اہلکاروں کی جانیں اور عوام کے جان و مال کا تحفظ ممکن ہو۔
آپ کا تبصرہ