اشعار/شہدائے کربلا کے حضور سلام عقیدت

شاعر: مولانا محمد ابراہیم نوری

حوزہ نیوز ایجنسی|

ہے سوز و مرثیہ خوانی حسین سے منسوب
ہے ساری اشک فشانی حسین سے منسوب

خوشی سے ہوتی ہے رفتارِ نور اس پہ نثار
ہے جس قلم کی روانی حسین سے منسوب

ثواب اس کا بشر کے بیاں سے باہر ہے
ہے میری اشک بیانی حسین سے منسوب

ہے جسکے پیشِ نظر بس رضائے ربِ حسینٔ
ہے مجلسوں کا وہ بانی حسین سے منسوب

فدا ہیں کوثر و تسنیم و سلسبیل اس پر
ہے جسکی تشنہ دہانی حسین سے منسوب

اسی لیے یہ بُجھاتا ہے آتشِ دوزخ
ہے میری آنکھ کا پانی حسین سے منسوب

مُقیمِ جنتِ کرب وبلا ہے کچھ دن سے
ہے دل کی نقلِ مکانی حسین سے منسوب

یزیدیوں کو بہت آگ یہ لگاتی ہے
ہے میری اشک فشانی حسین سے منسوب

قیامِ شاہ تھا امت کی مغفرت کے لئے؟
کرو نہ جھوٹی کہانی حسین سے منسوب

پیام دے گئے اکبرٔ یہی جوانوں کو
کرو تم اپنی جوانی حسین سے منسوب

ہمیں عزیز ہے عباس ٔ کے نشاں کی قسم
ہے جو بھی نوری نشانی حسین سے منسوب
۔۔۔۔۔۔۔۔۔۔۔۔۔۔۔۔۔۔۔۔۔۔۔
از قلم ابراہیم نوری قمی