حوزہ نیوز ایجنسی کے مطابق، جمعہ کو عالمی القدس کے حوالے سے پوری دنیا کے ساتھ میرپور بٹھورو میں بھی احتجاجی مظاہرہ کیا گیا۔
اسرائیلی و امریکی بربریت کے خلاف مظلوم فلسطینیوں سے اظہار یکجہتی اور امام خمینی رہ کے فرمان کے مطابق قبلہ اول کی آزادی کے لیے تحریک بیداری امت مصطفیٰؐ کی جانب سے میرپور بٹھورو میں مرکزی امام بارگاہ جعفریہ کے سامنے احتجاجی مظاہرہ کیا گیا۔
احتجاجی مظاہرے سے مولانا زاہد حسین زاہدی، سجاد خواجہ، حاجی نواز خواجہ اور رضا خواجہ نے خطاب کرتے ہوئے کہا کہ غزہ فلسطین میں اسرائیلی اور امریکی بربریت کی کوئی مثال نہیں ملتی۔
اس سفاکیت پر خاموشی نے انسانی حقوق کے نام نہاد دعویداروں کے چہروں سے نقاب ہٹا دیا ہے۔
ان کا مزید کہنا تھا کہ فلسطین کی آزادی کی جنگ خدا کی رضا میں جہاد اور اسلامی تقاضا ہے، جو انشاء اللہ فلسطین کی آزادی اور اسرائیل کی نابودی تک جاری رہے گی۔
