حوزہ نیوز ایجنسی کے مطابق، قائد ملت جعفریہ پاکستان علامہ سید ساجد علی نقوی نے زکوٰة فطرہ کے حوالے سے جاری بیان میں کہا ہے کہ شریعت کے مطابق ہر شخص پر فطرہ واجب ہے جو عید الفطر کی رات غروب آفتاب کے وقت بالغ،عاقل، اپنے حواس رکھتاہواور فقیر نہ ہو تو ضروری ہے کہ وہ اپنا اور ان تمام افراد کا جو اس کے زیر کفالت ہوں اُن غذاؤں میں سے جو اس کے شہر یا علاقے میں استعمال ہوتی ہوں مثلاً گندم، جو، چاول، مکئی، کھجور، کشمش وغیرہ تین کلو فی کس ادا کرے یا اس کی عمومی رائج قیمت مستحق شخص کو دے۔
انہوں نے کہا: عید الفطر کی رات غروب آفتاب سے پہلے اس مہمان کا فطرہ جو صاحب خانہ کی رضایت سے آئے اور اس کا نان خور بھی شمار ہوتا ہو تو اس صورت میں صاحب خانہ پر اس مہمان کا فطرہ واجب ہوگا جبکہ ویسے غروب آفتاب کے بعد آنے والے مہمان کا فطرہ صاحب خانہ پر واجب نہیں ہے یعنی محض کسی کو افطار کرانے پر اُس کا فطرہ واجب نہیں ہو گا۔
انہوں نے کہا: زکوٰة فطرہ لینے کا استحقاق وہ شخص رکھتا ہے جو زکوٰة لینے کا مستحق ہو، جس کے پاس اپنے اور اپنے اہل و عیال کے لئے سال بھر کے اخراجات نہ ہوں اور اس کا کوئی ذریعہ آمدن بھی نہ ہو جس کے ذریعے وہ اپنے اہل و عیال کا سال بھر خرچہ پورا کر سکے (البتہ فطرہ دینے کیلئے ترجیح غریب ترین رشتہ دار یا اپنے شہر والوں کو دیا جائے) جبکہ خود مستحق شخص پر فطرہ واجب نہیں ہے۔
آپ کا تبصرہ