حوزہ نیوز ایجنسی کی رپورٹ کے مطابق، حضرت فاطمہ زہرا سلام اللہ علیہا نہ صرف معنویت اور تقویٰ کے میدان میں درخشاں نمونہ ہیں بلکہ سماجی فعالیت اور اثرگذاری میں بھی ایک بے مثال اسوہ ہیں۔
آپ سلام اللہ علیہا کی سیرت ایک ایسا جامع طرزِ زندگی پیش کرتی ہے جس میں ایمان، سماجی ذمہ داری اور ذاتی ارتقا ایک دوسرے سے جڑے ہوئے ہیں۔
حضرت زہرا سلام اللہ علیہا کی سماجی فعالیت
حضرت زہرا سلام اللہ علیہا کا سب سے نمایاں سماجی کردار امامت و ولایت کے دفاع میں نمایاں ہوتا ہے۔ رسول خدا صلی اللہ علیہ وآلہ وسلم کی رحلت کے بعد آپ سلام اللہ علیہا نے غاصبانِ خلافت کے مقابل مضبوط استدلال اور شجاعت کے ساتھ قیام فرمایا اور امیرالمؤمنین علی علیہ السلام کی حقانیت کو واضح کیا۔ خطبہ فدکیہ آپ کی بلاغت، شجاعت اور سیاسی بصیرت کی روشن دلیل ہے۔
مستضعفین کی حمایت
آپ سلام اللہ علیہا ضرورت مندوں کی مدد میں ہمیشہ پیش پیش رہتیں۔ اپنے اموال کو غریبوں اور یتیموں میں تقسیم کر کے ایثار و مواسات کا عملی درس دیا۔ باغِ فدک بھی آپ سلام اللہ علیہا کی سرپرستی میں بہت سے مسلمان خاندانوں کا معاشی سہارا تھا۔
نسلِ آئنده کی تربیت
حضرت زہرا سلام اللہ علیہا کی تربیت یافتہ اولاد اسلام کی تاریخ میں محورِ ہدایت قرار پائی۔ آپ سلام اللہ علیہا کی تربیت نے آنے والی نسلوں تک دین کے حقیقی پیغام کو منتقل کیا۔
سماجی امور میں شرکت
مریضوں کی عیادت، دینی اجتماعات میں شرکت، رسول خدا صلی اللہ علیہ وآلہ وسلم اور امیرالمؤمنین علیہ السلام سے اہم مشاورت۔ یہ سب آپ سلام اللہ علیہا کی سماجی شمولیت کی مثالیں ہیں۔
فاطمی طرزِ زندگی کی بنیادیں
فاطمی زندگی کی اساس مضبوط ایمان اور ہمہ جہتی تقویٰ ہے۔ یہی صفات خواتین کو زندگی کے طوفانوں کے مقابل مضبوط بناتی ہیں۔
فاطمی خواتین سماج اور خاندان دونوں کی ذمہ داریوں کا احساس رکھتی ہیں۔ وہ تربیتِ اولاد، رفاہِ عامہ اور سماجی خدمت کے ذریعے معاشرے کی تعمیر میں حصہ لیتی ہیں۔
حضرت زہرا سلام اللہ علیہا نے وقت کے نظم و ضبط سے ثابت کیا کہ عورت اپنی انفرادی، خاندانی اور سماجی ذمہ داریاں بیک وقت احسن طریقے سے نبھا سکتی ہے۔ اسی توازن سے فاطمی خواتین ایک مضبوط اور پُرمقصد زندگی تشکیل دیتی ہیں۔
علم و دانش کی اہمیت
آپ سلام اللہ علیہا نے ہمیشہ علم کے حصول کو سراہا۔ فاطمی خواتین میدانِ علم، ثقافت اور سماجی خدمات میں فعال کردار ادا کر کے معاشرے میں مثبت تبدیلی لا سکتی ہیں۔
صبر و استقامت
مصائب اور سختیوں میں حضرت زہرا سلام اللہ علیہا کا صبر خواتین کے لیے کامل نمونہ ہے۔ فاطمی خواتین اسی صبر و توکل سے زندگی کے چیلنجز کا مقابلہ کرتی ہیں۔
حضرت فاطمہ زہرا سلام اللہ علیہا کی سیرت ہر دور کی مسلمان خواتین کے لیے رہنمائی کا ایسا روشن چراغ ہے جو انہیں ایمان، کردار اور عمل کے ذریعے ایک متوازن، باوقار اور بااثر زندگی کی دعوت دیتا ہے۔
آپ کا تبصرہ