حوزہ نیوز ایجنسی کی رپورٹ کے مطابق، قائد ملت جعفریہ پاکستان علامہ سید ساجد علی نقوی نے 31 دسمبر 2025ء شہید ذوالفقار نقوی ایڈوکیٹ کی 29 ویں برسی کی مناسبت سے جاری اپنے پیغام میں کہا: ملکی سلامتی و استحکام کے لئے ہماری جدوجہد تسلسل کے ساتھ جاری ہے اور اس راستے میں زندگی سے کے مختلف شعبہ ہائے حیات سے وابستہ محب وطن، مخلص شخصیات نے قیمتی جانوں کے نذرانے پیش کرنے سے بھی دریغ نہیں کیا۔
انہوں نے مزید کہا: اسی تناظر میں ممتاز قانون دان، سیاسی و سماجی شخصیت اور ملی پلیٹ فارم کے صوبائی رہنما سید ذوالفقار حسین نقوی ایڈووکیٹ نے متواتر اور مسلسل جدوجہد جاری رکھی اور اعلی و ارفع اہداف کے حصول کی خاطر پاکیزہ مشن کی تکمیل کرتے ہوئے اس راہ میں درجہ شہادت پر فائز ہو گئے۔
علامہ ساجد نقوی نے کہا: عوام کے آئینی اور شہری حقوق کا دفاع اور تحفظ ہماری جدوجہد کا مرکز و محور رہا۔ اسی تناظر میں سید ذوالفقار حسین نقوی ایڈووکیٹ نے عوام کے قانونی حقوق کی جدوجہد میں نمایاں کردار ادا کیا اور شریف، مہذب، قانون پسند اور محب وطن شہریوں کو انصاف کی فراہمی میں انتھک محنت و کوشش کی۔
انہوں نے مزید کہا: شہید کی ملی و مذہبی خدمات کو خراج عقیدت پیش کرنے کے لئے لازم و ناگزیر ہے۔ ان کے مثبت کردار کو مشعل راہ بنایا جائے۔
برسی کے اس موقع پر قائد ملت جعفریہ پاکستان نے شہید ذوالفقار حسین نقوی ایڈووکیٹ اور شہدائے ملت کے درجات کی بلندی اور وطن عزیز کے استحکام و سلامتی کی بھی خصوصی دعا کی۔
قابل ذکر ہے کہ شہید ذوالفقار حسین نقوی ایڈووکیٹ کو 31 دسمبر 1996ء کو لاہور میں دہشتگردی کا نشانہ بنایا گیا تھا۔
آپ کا تبصرہ