حوزہ نیوز ایجنسی|مستدرک امام حاکم کی روایت کے مطابق اللہ تعالٰی نے اپنے پیارے حبیب حضرت محمد مصطفی صل اللہ علیہ وآلہ وسلم کو اس بقیع کی جگہ قبرستان بنانے کاحکم فرمایا تھا۔اسلام کے اس پہلے اور عظیم قبرستان کا باقاعدہ آغاز رسول خدا کے باوفا اصحاب ؛انصار مدینہ کے اسعدبن ذرارہ اور عثمان بن مظعون کے دفن سے ہوا۔
عام مسلمانوں کی اہم ترین کتاب صحیح مسلم اور سنن نسائی میں جنت البقیع کے بارے میں ام لمومنین حضرت عائشہ سے روایت نقل ہوئی ہے کہ رسول خدا نےفرمایا کہ ”خدا نے مجھے حکم دیا ہے کہ بقیع جاؤں اوراہل بقیع پہ سلام اور طلب مغفرت کروں“ پھر اس سے مربوط دعا بھی اسی روایت میں موجود ہے۔
”چونکہ اوائل اسلام میں اکثر مسلمانوں کے آبا و اجداد کافر یا مشرک مرے تھے اس لیے بعض روایت کے مطابق انکے قبورپہ جانے سے رسول خدا نے منع کیا تھا“
جب آپ ﷺ کےخاص چاہنے والوں اور شمع رسالت کے پروانوں کا انتقال ہوا یا انکی شہادت ہوی تب رسول خدا نےمسلمانوں کو تاکید کی کہ وہ قبور کی زیارت کے لیے جائیں ۔انکو سلام کریں انکے لیے اور اپنے لیے قبرستان جاکر طلب مغفرت کریں اوراپنی موت و آخرت کو یاد کریں۔“
اس سلسلے میں بہت ساری احادیث ؛فضائل و فلسفہ زیارت قبور و آداب زیارت قبور۔احادیث کی مستند سمجھی جانے والی قدیمی کتابوں میں موجود ہیں۔جن میں اہل سنت کی صحاح ستہ میں سے صحیح مسلم،صحیح ابن ماجہ ، سنن ابن داود ،سنن ترمذی ،نسائی اور ابن حجر عسقلانی کی کتابیں مشہور و معروف ہیں۔ان کے علاوہ مختلف مکاتب فکر کے جید علما ٕ کرام نے اس موضوع پر سینکڑوں کتابیں لکھی ہیں۔
جنت البقیع میں اوائل اسلام کی عظیم شخصیات کی قبور ہیں جن میں حضرت رسول خدا کے فرزند جناب ابراھیم ، حضرت علی ع کی والدہ حضرت فاطمہ بنت اسد ، حضرت عبداللہ ابن جعفرطیار ، حضرت عباس ابن عبدالمطلب ، حضرت ام البنین ، حضرت حلیمہ سعدیہ ، امہات المومنین میں سے حضرت ام سلمہ ، حضرت حفصہ بنت عمر ، حضرت ام حبیبہ ، حضرت زینب ، حضرت ریحانہ ، حضرت ماریہ قبطیہ وغیرہ یہاں دفن ہیں۔کٸی شہدا ٕ احد اور واقعہ حرا کے شھدا ٕ بھی یہاں دفن ہیں۔
بعض روایت کے مطابق رسول خدا کی اکلوتی بیٹی ، قرة عین الرسول ؛ حضرت فاطمہ زہرا س کی قبر مبارک بھی اسی ویرانے میں موجود ہے۔
مسلمانوں کاتیسرا خلیفہ حضرت عثمان جو کہ پہلے بقیع کے باہر دفن تھے اب وہ بھی بقیع کی احاطہ کے اندر ہے۔
”بیت الحزن“ جو کہ حضرت علی ع نے بعض مدینہ والوں کی طرف سے حضرت فاطمہ اپنے بابا حضرت محمد ﷺ کے فراق میں ذیادہ گریہ کرنے کی کے سبب شکایت کرنے پر مدینہ سے باہر فقط رونے کے لیے جو جگہ بنائی تھی وہ بھی اب جنت البقیع کاحصہ ہے۔
حضرت علی ع کے بھائی جناب عقیل کا ذاتی گھر جس میں بعد میں ہمارے آئمہ اربعہ نواسہ رسول امام حسن ع ، امام سجاد ع ، امام محمد باقرع اور امام جعفرصادق ع دفن ہوے وہ بھی اسی جنت البقیع میں ہے۔
اسکے علاوہ ہزاروں کی تعداد میں رسول خدا کے باوفا اصحاب کرام ، تابعین کرام ، تابعین ، امہات المومنین اور ابتداٸی شھدائے اسلام کی قبور مبارک یہاں موجود ہیں۔
جنت المعلّٰی
مسلمانوں کے دوسرے اہم ترین اور قدیمی قبرستان جنت المعلّٰی ہے جو کہ مکہ شریف میں واقع ہے ۔جہاں رسول خدا کی پہلی اور چہیتی بیوی جو صنف نسواں میں سب سے پہلے نہ فقط ایمان لے آئی بلکہ عرب کی مالدار خاتون ہونے کی وجہ سے اپنے تمام تر مال و دولت رسول خدا کے سپرد کیا تا کہ اس سے ضعیف اور نادار مسلمانوں کی مدد کر سکے یعنی ام المومنین حضرت خدیجہ س کی قبرمبارک ہے۔
یہاں دوسری اہم شخصیت حضرت ابوطالب جو سپر بن کر رسول خدا کی حفاظت کرتے رہے بلخصوص اس وقت جب ابوسفیان اور اس وقت کے دیگر کفار و مشرکین نے سوشل بائیکاٹ کرتے ہوے شعب ابی طالب میں رسول خدا ور انکے حقیقی چاہنے والوں اور آپ کے قریبی رشتہ داروں کا ہر طرف سے محاصرہ کر رکھا تھا تو یہی ابوطالب رسول خدا کا ساتھ دیتے ہوے ، حفاظت کرتے ہوے ، ابوسفیان اور دیگر سے مقابلہ کرتے رہے اسلام کے ایسے ایسے گوہر نایاب اور رسول خدا کے حقیقی بے لوث و باوفا شخصیات یہاں دفن ہیں۔
تاریخ اسلام شاہد ہے کہ جس سال ام المٶمنین حضرت خدیجہ اور حضرت ابوطالب کا انتقال ہوا تو رسول خدا نے اس سال کو ”عام الحزن“ یعنی غم کا سال قرار دیا تھا ۔انکے انتقال کے بعد پھر مکہ رہنے کا قابل نہ رہا اور آپ ص نے وہاں سے ہجرت کی۔
مدینہ مبارکہ میں حضرت رسول خدا کے چچا سید الشھدا جناب حمزہ جن کا جگر ابوسفیان کی بیوی (۔معاویہ کی ماں ، یذید کی دادی ہندہ نے چبایا تھا)۔وہ اور جنگ احد کے دیگر شہدا کی قبور بھی ویرانے کی شکل میں یہاں موجود ہیں۔
صحاح ستہ کی بعض روایتوں کے مطابق حضرت رسول خدا نہ فقط حضرت حمزہ سیدالشھدا پہ رویے بلکہ مدینہ کی عورتوں سے بھی فرمایا کہ وہ جناب حمزہ پہ ماتم کریں۔
اسلام کے ان عظیم جانثاروں اور محافظوں کی قبورپہ نہ فقط رسول خدا خود تشریف لے جاتے اور انکے لیے دعا کیا کرتے تھے بلکہ دوسرے مسلمانوں کو بھی جانے کی تلقین اور زیارت کے آداب سکھایا کرتے تھے۔
جنت البقیع کی جدید تعمیر
رفتہ رفتہ شمع رسالت کے پروانوں نے اسلام کی ان عظیم شخصیات کی قربانیوں اور انکے کارناموں کو ہمیشہ یاد رکھنے کے لیے ”جنت البقیع اورجنت المعلی کی ان
قبور پر گنبد اور حجرہ بنواۓ تھے۔
ساتویں صدی ہجری میں عمربن جبیر نے اپنے مدینہ کے سفر میں جنت البقیع میں مختلف قبور پر قبوں اور گنبدوں کا ذکر کیا ہے۔پھر ایک سو سال بعد ابن بطوطہ نے بھی اپنے سفر نامے میں ان قبّوں اور گنبدوں کا ذکر کیا ہے ۔
کئی صدیوں تک یہ مزارات عالم اسلام کے لیے باعث تعظیم اور ایمان کی تازگی کا باعث بنے رہے سلطنت عثمانیہ کے دور میں بھی چونکہ یہاں محمد وآل محمد کے عاشقوں یعنی اہل سنت بھائیوں کی حکومت تھی تو ان مزارات کی رونق بھی تھی ۔
انہدام کے اسباب
پھر انیسویں صدی کے اواخر اور بیسویں صدی کے آغاز میں اسلام دشمنوں نے دین اسلام کو دنیا سے ختم کرنے کی ایک عالمی کوششوں کا سلسلہ شروع کیا جس کے تحت برصغیر میں مرزائیت یا قادیانیت ، ایران میں بھائیت، سوڈان میں مھدویت ، لیبیا میں سنوسی ، نائجیریا میں فلافی ، انڈونیشیا میں پادری ،
جبکہ حجاز میں وہابیت کو پری پلاننگ فروغ دینا شروع کیا۔
محمد ابن عبدالوہاب جوکہ پیدائشی حنبلی تھا مدینہ منورہ میں ابتدائی تعلیم کے بعد بغداد ، بصرہ ، دمشق ، ہمدان اور قم میں تعلیم حاصل کرتا رہا بعد میں قرآن و حدیث میں ذاتی نظریات کے ذریعے مسلمانوں کے درمیان مسلمہ عقائد کے خلاف بولنے لگے جس پہ اہل سنت علما نے انکو اپنی درسگاہ اور علاقوں سے نکال دیا تو یہ سرزمین نجد چلا گیا۔
اس وقت محمد بن سعود اپنے قبیلہ کا سربراہ اپنی مختصر سلطنت کو وسعت دینے کی تک و دو کررہا تھا۔ دونوں کی ملاقات میں کافی ہم آہنگی ہوئی اسی دوران برطانیہ سلطنت عثمانیہ اور مسلمانوں کو زمینی و عقائدی طور پر ٹکڑے ٹکڑے کرنے کی پالیسی پہ گامزن تھا لذا انھوں نے محمد بن سعود کو ہرطرح کی مدد کا وعدہ کیا اور انکی پشت پناہی کے سبب محمد بن سعود نے نجد سے حجاز تک فتح کرلیا اور انکی حکومت قائم کی برطانیہ نے یہاں تک طےکر کے دیا کہ حکومت آل سعود کی جبکہ قضاوت ومذہبی عہدے آل وہاب کے ہونگے یہ کبھی ایک دوسرے کے معاملات میں مداخلت نہیں کرینگے ۔ آقا کے اس فیصلے پر انکی نسلیں اب بھی کاربند اور انکی جی حضوری و نمک حلالی میں مصروف و مگن ہیں۔ ان لوگوں نے مدینہ و مکہ میں شیعہ علما کے علاوہ ایک دن میں پانچ سو کے قریب اہل سنت کے جید علما کرام کو قتل کیا۔( یہ باتیں میں نے سنی تحریک کےسربراہ شھید سلیم قادری کے منہ سے سنی ہیں جو مستند حوالہ کے ساتھ بتا رہے تھے)
یوں محمد بن عبدالوہاب اور محمد بن سعود اور برطانوی حمایت سے حجاز سے سنیوں کا صفایا کر کے وہابیت کی داغ بیل ڈالی گئی۔ محمد بن سعود کا اصل نام محمد ہونے کے باوجود سرزمین وحی کو محمدیہ رکھنے کی بجائے سعودیہ رکھ دیا۔
محمد بن عبدالوہاب کا نام محمد ہونے کے باوجود انکےخود ساختہ مکتب کو بھی محمدیہ کی بجائے باپ کے نام پر وہابی رکھ دیا آخرکیوں؟
یہ بات اس وقت سمجھ میں آتی ھے جب ہم دیکھتے ہیں کہ 8 شوال 1344 ہجری بمطابق 21اپریل 1926 کو محمد بن سعود نے محمد بن عبدالوہاب کے فتوا پر جنت البقیع میں موجود انبیا۔ ، اوصیا ، آئمہ ، اصحاب کرام اور امہات المومنین کے گنبد اور بنے ہوے مزارات کو منہدم کردیا۔۔۔یعنی یہ صدر اسلام کے کسی بھی نشانی کو باقی رکھنا نہي چاہتے تھے۔
پس وہ مزارات و قبور جو تقریبا ساڑھے تیرہ سو سال سے مسلمانوں کو صدر اسلام کے جانثاروں اور وفاداروں کی بے لوث قربانیوں کی یاد دلاتے تھے ، جن کی زیارت سے مسلمانوں کا ایمان تازہ ہوا کرتا تھا ۔جو شعائرالہی کے مصادیق میں سےکچھ مصداق بنے ہوئے تھے انہیں ڈھادئےگئے ۔
شہر جدّہ جوکہ ہماری جدہ ماجدہ حضرت حوا کے مزار کی وجہ سے نام پڑگیا تھا اب تو اسے بھی شھید کیا جا چکا ہے
جب کہ یہ سب بھی شعائراللہ میں سے تھے جنہیں دیکھ کر خدا اور خدا کے رسول یاد آتے تھے۔
خدانے قرآن مجید میں سورہ حج اور سورہ مائدہ میں قربانی کے اونٹ اور دیگر جانوروں ، صفا و مروہ کی پہاڑیوں ، محترم مہینوں ، خدا حکم پر لبیک کہتے ہوے آنے والے حاجیوں کو بھی ”شعائراللہ“ کہا ہے اور ان شعائر کی توہین کرنے سے منع کیا ہے مگر افسوس وہابیوں ،نجدیوں نے ان تمام شعائر اسلام کو ڈھادیا اور ویران کردیا۔بسا اوقات حاجیوں کو بھی نہیں بخشا۔
جبکہ یہ کوئی فقہی مسئلہ نہی تھا۔اوائل اسلام سے اب تک جہاں جہاں بھی اسلام پہنچا ہے مصر سے سوڈان تک ، اسپین سے ہندوستان تک ، فلسطین سے چین تک آپ کو اولیااللہ کے مزارات ملیے گی۔
اہل سنت آٸمہ اربعہ کے مزارات
جس ابن تیمیہ کے نظریات پر عبد الوہاب نے بنا رکھی ہے اس ابن تیمیہ کا مزار آج بھی شام کے شہر دمشق میں ،
امام احمد ابن حنبل کا مزار عراق کے شہر بغداد میں ،
امام شافعی کا مزار مصر کے شہر قاہرہ میں جبکہ
امام ابو حنیفہ کا مزار عراق کے شہر بغداد میں موجود ہیں۔
مگر جنت البقیع اور جنت المعلی ویران ہیں
عالم اسلام سراپا احتجاج
جس وقت جنت البقیع کو ڈھایا گیا تمام عالم اسلام سراپا احتجاج ہوگئے ۔ترکی میں اتاترک اور نجدیوں کے ذریعے خلافت عثمانیہ کے ظاہری اور نام کی حد تک موجود ہی سہی اس نشانی کو بھی ختم کیا تو برصغیر کے تمام مسلمان تحریک خلافت چلا رہے تھے تو اسی دوران خلافت کمیٹی بنائی گئی۔ مولانا محمد علی جوہر نے برصغیر کے مسلمانوں کے ایمانی جذبات کی ترجمانی کرتے ہوے نجد کے حاکم کو احتجاجی خط بھی لکھا ۔ مسلمانان عالم کے احتجاج اور قطیف کے شیعوں کا بروقت مدینہ پہنچنے اور مزاحمت کرنے کی وجہ سے رسول خدا کا روضہ مبارک شھید ہونے سے تو بچ گیا مگر آج بھی کسی کو وہاں جالی کو چھونے یا عقیدت سے چومنے نہیں دیتے ۔ قطیف کے شیعہ ابھی تک روضہ رسول کو بچانے کی سزا بھگت رہے ہیں۔
موجودہ سعودی عرب اور مقدس مقامات
اگرچہ آج سعودی عرب بدل چکا ہے ، سرزمین وحی میں عالیشان بت خانے غیر مقامی ہندوں کے لیے بنائے گئے ہیں۔
لبرل ازم کے نام پر سینکڑوں مےخانے اور جواخانے کھول دیے گئے ہیں۔ہولی سے لے کر کرسمس تک کی آزادی ہے۔
مگر مسلمانوں کو اجازت نہیں کہ وہ رسول خدا کے مزار کی جالی چومیں ، ہمارے آئمہ اربعہ کی قبر پر فاتحہ پڑھیں ، حضرت حلیمہ سعدیہ کی قبر پر سلام کریں۔
ام المومنین حضرت خدیجہ کی قبرپہ جاکر انکی بے لوث قربانیوں کو یاد کریں۔
سید الشھدا حضرت امیر حمزہ کی قبرپہ جاکر خراج تحسین پیش کریں۔۔۔افسوس۔۔۔
عبد الوہاب کے فتوای اور محمدبن سعود کےظلم کے سبب آج بھی لاکھوں کروڑوں عاشقان رسول ، عاشقان اہلبیت ، عاشقان صحابہ کرام اور عاشقان امہات المومنین کے دل خون کے آنسو رو رہے ہیں۔
خدا ان عاشقوں محب اھلبیت سنیوں یا دین کا درد رکھنے والے اخوان المسلمین یاکسی بھی مسلمان کے ہاتھوں ان مزارات کی تعمیر کرنے اور ھم سب مسلمانوں کو ان زیارت گاہوں کی زیارت کرنےکی توفیق عطا فرماٸے.
تحریر:محمد بشیر دولتی
نوٹ: حوزہ نیوز پر شائع ہونے والی تمام نگارشات قلم کاروں کی ذاتی آراء پر مبنی ہیں حوزہ نیوز اور اس کی پالیسی کا کالم نگار کے خیالات سے متفق ہونا ضروری نہیں۔
