حوزہ نیوز ایجنسی کی رپورٹ کے مطابق عالم ربانی آیت اللہ یزدی کی رحلت پر آیت اللہ مکارم شیرازی نے تعزیتی پیغام ارسال کیا ہے، جس کا متن اس طرح ہے:
بسم اللہ الرحمن الرحیم
عالم مجاہد آیت اللہ الحاج شیخ محمد یزدی رحمۃ اللہ علیہ کی رحلت کی خبر سن کر بہت دکھ ہوا۔
وہ ایک بہادر عالم دین تھے جنہوں نے عمر بھر اسلام اور مکتب اہل بیت علیہم السلام کی بہت زیادہ خدمت کی۔
وہ ہمیشہ انقلاب اور اسلامی جمہوریہ ایران کے نظام کی خدمت میں رہتے تھے اور اس مقدس ہدف کے لیے انہوں نے ہر فرصت سے استفادہ کیا۔ انہوں نے انقلاب اسلامی کے اہم عہدوں پر خدمت کے علاوہ عرصہ دراز تک جامعہ مدرسین کے سربراہ کی حیثیت سے اس ادارے میں گرانقدر خدمات انجام دیں۔
میں ان کے انتقال پرملال پر علماء کرام، حوزہ علمیہ، جامعہ مدرسین اور بالخصوص مرحوم کے خاندان اور فرزندان کی خدمت میں تعزیت پیش کرتا ہوں اور دعا گو ہوں کہ خداوند متعال مرحوم کے درجات بلند فرمائے اور پسماندگان کو صبر جمیل اور اجر جزیل عنایت فرمائے۔
قم۔ ناصر مکارم شیرازی
10 دسمبر 2020ء
