حوزہ نیوز ایجنسی کی رپورٹ کے مطابق، اسلامی جمہوریہ ایران کے صدر ڈاکٹر مسعود پزشکیان نے صیہونی حکومت کے حالیہ مجرمانہ حملے کی شدید مذمت کرتے ہوئے کہا ہے کہ ہم اس ظلم پر خاموش نہیں رہیں گے اور اسلامی جمہوریہ ایران کا قانونی اور فیصلہ کن جواب دشمن کو اس کے احمقانہ اقدام پر پشیمان کر دے گا۔
ایرانی صدر ڈاکٹر پزشکیان نے کہا کہ آج ایرانی عوام کو پہلے سے کہیں زیادہ باہمی اعتماد، اتحاد اور ہمدلی کی ضرورت ہے اور ان شاء اللہ خدا کے فضل سے یہی جذبہ ہمیں اس مجرمانہ حملے کا سخت اور شجاعانہ جواب دینے کے قابل بنائے گا۔
انہوں نے کہا کہ گزشتہ شب، قابض اور مجرم صہیونی حکومت نے تہران اور ملک کے دیگر شہروں پر ایک وحشیانہ حملہ کیا، جس کے نتیجے میں بےگناہ بچوں اور خواتین، متعدد عام شہریوں، فوجی کمانڈروں اور جوہری سائنس دانوں کی شہادت ہوئی۔ یہ درندگی جو بین الاقوامی قوانین اور انسانی اصولوں کی کھلی خلاف ورزی ہے، اس غیر قانونی حکومت کی مجرمانہ فطرت کو ظاہر کرتی ہے، جس کی بنیاد ہی قبضے، جارحیت اور بچوں کے قتل پر رکھی گئی ہے۔ یہ حملہ اس سچائی کی گواہی ہے جسے اسلامی جمہوریہ ایران برسوں سے دہرا رہا ہے کہ صیہونی حکومت کا وجود ہی ظلم و بربریت سے جڑا ہوا ہے۔ اس جارحیت اور بزدلانہ حملے پر ہم نہ خاموش بیٹھیں گے اور نہ نظر انداز کریں گے۔ اسلامی جمہوریہ ایران کا قانونی، قاطع اور طاقتور ردعمل، ان شاء اللہ دشمن کو اس جارحیت پر شدید ندامت میں مبتلا کر دے گا۔چنانچہ حضرت امام خمینی نے فرمایا تھا کہ اگر کسی سردار کے ہاتھ سے پرچم گر جائے، تو کوئی دوسرا بہادر اسے اٹھا کر میدان میں آئے گا۔ ان کمانڈروں کا راستہ بھی ان کے وفادار اور بہادر ساتھی جاری رکھیں گے۔
ایرانی صدر ڈاکٹر پزشکیان نے کہا کہ ایران نے ہمیشہ عالمی اور علاقائی امن کے لیے سنجیدہ مذاکرات اور اعتماد سازی پر زور دیا ہے، لیکن اب وقت ہے کہ وہ اپنی خودمختاری کے دفاع میں ایک مضبوط، حکیمانہ اور عملی اقدام کرے۔
انہوں نے مزید کہا کہ میں ایرانی عظیم قوم سے اپیل کرتا ہوں کہ اتحاد اور یکجہتی کو برقرار رکھے؛ دشمن کی طرف سے پھیلائی گئیں افواہوں اور نفسیاتی جنگ کا شکار نہ ہو؛ حکومتی اداروں پر بھروسہ رکھے اور ایک باشعور اور متحد قوم کی طرح ان سخت حالات سے گزرنے کی تیاری کرے۔
ڈاکٹر پزشکیان نے کہا کہ میں آپ کو یقین دلاتا ہوں کہ جمہوری اسلامی ایران کی حکومت پوری قوت کے ساتھ اپنی عوام کی خدمت جاری رکھے گی اور روزمرہ زندگی کے نظام میں کسی قسم کی خلل پیدا نہیں ہونے دے گی۔
ایرانی صدر نے کہا کہ آج ایرانی قوم کو ماضی سے زیادہ قومی یکجہتی، اعتماد، ہوشیاری اور اخوت کی ضرورت ہے۔ ان شاء اللہ، ہم اپنے رہبر معظم آیت اللہ خامنہای (مدظلہالعالی) کی زیرِ قیادت، اس مشکل مرحلے سے بھی سربلند اور باعزت نکلیں گے اور صیہونی جارحیت کا بھرپور اور تاریخی جواب دیں گے۔
آپ کا تبصرہ