حوزہ نیوز ایجنسی کی رپورٹ کے مطابق، مجلسِ وحدت مسلمین پاکستان کے تحت ایران کے خلاف اسرائیلی جارحیت پر ملک گیر احتجاجات چاروں صوبوں سمیت آزاد کشمیر و گلگت بلتستان میں بھی احتجاجی مظاہرے کیے گئے۔
احتجاجی مظاہرے میں علماء اور بچوں سمیت شہریوں نے کثیر تعداد میں شرکت کی اور شرکائے احتجاج نے ایران پر اسرائیلی جارحیت کے خلاف امریکہ اور اسرائیل کے خلاف شدید نعرے بازی کی۔
مقررین نے احتجاجی مظاہرے سے خطاب کرتے ہوئے کہا کہ اسرائیل ایک دہشتگرد رجیم ہے اور عالمی امن کے لیے خطرہ ہے۔ اسرائیل نے پورے خطے کو جنگ میں جھونک دیا ہے؛ اسرائیلی جارحیت میں مکمل طور پر امریکی مدد شامل ہے۔ عالم اسلام کو متحد ہو کر اسرائیل اور امریکی دہشتگردانہ کارروائیوں کا مقابلہ کرنا ہو گا۔ امریکہ نے اسرائیل کو خطے میں باولے کتے کی طرح چھوڑ دیا ہے۔ اسرائیل ہر ایک کو کاٹتا پھر رہا ہے؛ اسرائیل کا پٹہ امریکہ کے ہاتھ میں ہے۔
انہوں نے کہا کہ "امریکی سرپرستی میں ایران پر اسرائیلی حملہ بین الاقوامی قوانین، اقوام متحدہ کے منشور اور ریاستی خودمختاری کے اصولوں کی صریح خلاف ورزی ہے۔ اس جارحیت پر اسلامی دنیا کی خاموشی لمحۂ فکریہ ہے۔ وقت کا تقاضا ہے کہ تمام اسلامی ممالک اسرائیل کے جارحانہ عزائم کے خلاف آواز بلند کریں اور برادر اسلامی و ہمسایہ ملک ایران کی سفارتی، اخلاقی اور ممکنہ حد تک عملی امداد کریں۔
مقررین نے احتجاجی مظاہرے سے خطاب کرتے ہوئے کہا کہ عالمی دہشت گرد اسرائیل اور اس کا سرپرست امریکہ نے مشرق وسطیٰ کو بدامنی، تباہی اور جنگ کی آگ میں دھکیل دیا ہے۔ یہ ناپاک سازش صرف ایران نہیں، بلکہ ہر آزاد اور غیرت مند مسلم ملک کے خلاف ہے۔ ہم مطالبہ کرتے ہیں کہ اقوام متحدہ، OIC اور مسلم دنیا اسرائیل کی اس بزدلانہ جارحیت کا نوٹس لے اور فوری کارروائی کرے۔
آپ کا تبصرہ