حوزہ نیوز ایجنسی کی رپورٹ کے مطابق، انجمن امامیہ بلتستان کے صدر علامہ سید باقر الحسینی نے کہا ہے کہ جس طرح چلاس ایک محروم علاقہ ہے، اسی طرح بلتستان بھی محرومی کا شکار ہے۔ الحمدللہ، دونوں علاقے مذہبی اقدار کے حامل ہیں۔ آفیسران کو ہماری مذہبی روایات کا خیال رکھنا ہوگا۔
انہوں نے کہا کہ اسکولوں کے بچوں کو دین سکھانے کی ضرورت ہے، انہیں بے دین بنانے کی کوششیں نہیں ہونی چاہئیں۔
محکمہ تعلیم کی جانب سے منعقدہ ویلکم و فیئر ویل پارٹی سے خطاب کرتے ہوئے انہوں نے کہا کہ اسکولوں میں اسلام کی مقدس ہستیوں کی سوانحِ حیات پر لیکچرز دیے جائیں، بچوں کو اخلاق و آداب سکھائے جائیں۔
ایک وقت تھا جب اسکولوں میں بزمِ ادب کا اہتمام ہوتا تھا، بچوں کو تقریریں سکھائی جاتی تھیں اور انہیں اخلاقی تعلیم دی جاتی تھی، مگر اب ایسا کچھ نظر نہیں آتا۔ آج کل اسکولوں میں بزمِ ادب کے بجائے "بزمِ بے ادب" متعارف کرائی جا رہی ہے۔
انہوں نے مزید کہا کہ نئے ڈائریکٹر ایجوکیشن، عبد الوہاب میر کے ساتھ بھرپور تعاون کیا جائے۔ وہ جب اور جس وقت چاہیں، ہمیں بلا سکتے ہیں۔ ہمارے دروازے ان کے لیے کھلے ہیں، وہ خود کو تنہا نہ سمجھیں۔
آپ کا تبصرہ