حوزہ نیوز ایجنسی کی رپورٹ کے مطابق، کتاب «حقیقت عظیم» میں رہبر شہید آیت اللہ العظمیٰ سید علی خامنہ ای نے حضرت فاطمہ زہرا سلام اللہ علیہا کی شخصیت کے مختلف پہلوؤں پر روشنی ڈالی ہے۔ آپؒ حضرت زہرا سلام اللہ علیہا کو انسانی ذہن اور انسانی معارف کے لیے ایک ایسی عظیم حقیقت قرار دیتے ہیں جس کی تمام جہات کا ادراک آسان نہیں ہے۔
آپؒ فرماتے ہیں کہ حضرت فاطمہ زہرا سلام اللہ علیہا کی شخصیت اس قدر وسیع اور بلند ہے کہ انسان ان کے مقام و مرتبے کو پوری طرح سمجھنے سے قاصر رہتا ہے۔ اگر آپؑ کی عظمت انسانی ذہنوں اور نگاہوں کے سامنے پوری طرح واضح ہوجائے تو سب اس بات کی تصدیق کریں گے کہ آپؑ تمام عالم کی خواتین کی سردار ہیں۔
کتاب کے اہم موضوعات
اس کتاب میں حضرت فاطمہ زہرا سلام اللہ علیہا کی شخصیت، آپؑ کی ظاہری زندگی، عملی فضائل، معنوی مقامات، برکات اور اسوہ ہونے کے پہلوؤں پر گفتگو کی گئی ہے۔ اس کے علاوہ حضرت زہرا سلام اللہ علیہا کے حوالے سے ہماری ذمہ داریوں، اسلامی انقلاب سے آپؑ کے تعلق اور اسلام و مغرب کے نقطۂ نظر سے خواتین کے مقام جیسے موضوعات بھی شامل ہیں۔
کتاب کی تدوین کے مراحل
کتاب کی تدوین کے لیے تین بنیادی مراحل اختیار کیے گئے۔ پہلے مرحلے میں آیت اللہ العظمیٰ سید علی خامنہ ای کے بیانات اور تحریروں سے حضرت فاطمہ زہرا سلام اللہ علیہا سے متعلق مواد جمع کیا گیا۔ اس کام میں اہل بیت علیہم السلام کی سیاسی سیرت سے متعلق علمی گروپ نے حصہ لیا۔
دوسرے مرحلے میں قرآنی، روایی اور تاریخی مطالب کے مستند حوالوں کی تلاش کی گئی۔ اس مقصد کے لیے شیعہ اور اہل سنت کے معتبر قدیم منابع سے استفادہ کیا گیا اور حتی الامکان چھٹی صدی ہجری کے اختتام تک کی کتابوں کو پیش نظر رکھا گیا۔ اس عمل میں کتاب «بحار الانوار» سے بھی مدد لی گئی۔
کتاب کی ایک اہم خصوصیت موضوعات کی تفصیلی فہرست ہے، جسے رمزی شکل میں شامل کیا گیا ہے تاکہ محققین اور عام قارئین اپنی ضرورت کے مطابق متعلقہ موضوعات تک آسانی سے پہنچ سکیں۔
رہبر معظم اس بات پر بھی زور دیتے ہیں کہ حضرت زہرا سلام اللہ علیہا کی عظمت کے ساتھ اس اسلامی مکتب کی عظمت بھی قابل توجہ ہے، جس نے ایسی بلند مرتبہ شخصیت کی تربیت کی۔ آپؑ نے مختصر زندگی میں ایسا مقام حاصل کیا کہ تمام عالم کی خواتین کی سردار قرار پائیں۔
رہبر شہید کے مطابق، حضرت فاطمہ زہرا سلام اللہ علیہا کی زندگی تمام مردوں اور عورتوں، مؤمنوں اور مسلمانوں کے لیے نمونۂ عمل ہے۔ ضروری نہیں کہ ہر شخص آپؑ کے مقام تک پہنچ سکے، لیکن ہر ایک کو چاہیے کہ آپؑ کے راستے پر چلنے اور آپؑ کے قریب ہونے کی کوشش کرے۔
حضرت زہرا سلام اللہ علیہا کی معرفت کی ضرورت
کتاب میں اس بات پر بھی زور دیا گیا ہے کہ حضرت فاطمہ زہرا سلام اللہ علیہا کی شخصیت کے مختلف پہلوؤں کو سمجھنے کے لیے مزید علمی اور تحقیقی کام کی ضرورت ہے۔ رہبر شہید آیت اللہ العظمیٰ سید علی خامنہ ای کے مطابق، آپؑ کی زندگی کے مختلف پہلو نہایت اہم، غیر معمولی اور انسان کی تربیت و رہنمائی کے لیے مؤثر ہیں۔
رہبر شہید اس بات کی طرف توجہ دلاتے ہیں کہ حضرت زہرا سلام اللہ علیہا کے بارے میں بہت سے ایسے موضوعات موجود ہیں جنہیں بہتر انداز میں سمجھنے اور دنیا تک پہنچانے کی ضرورت ہے۔ یہی وجہ ہے کہ آپؑ کی سیرت اور شخصیت پر تحقیق اور مطالعے کا سلسلہ جاری رہنا چاہیے۔
آپ کا تبصرہ