کتاب «جناب سیدہؑ؛ اسرارِ الٰہیہ کا خزانہ» میں سیرتِ فاطمیؑ کے مختلف پہلوؤں کا جائزہ

حوزہ نیوز ایجنسی کی رپورٹ کے مطابق، جناب سیدہ فاطمہ زہرا سلام اللہ علیہا کے فضائل و مناقب، مقامِ ولایت، قرآنی معارف اور سیرتِ طیبہ کے مختلف پہلوؤں پر مشتمل کتاب «جناب سیدہؑ؛ اسرارِ الٰہیہ کا خزانہ» میں متعدد اہم موضوعات کو مختصر، جامع اور تحقیقی انداز میں پیش کیا گیا ہے۔ کتاب میں آئمہ معصومین علیہم السلام کی نگاہ میں جناب سیدہؑ کی عظمت و منزلت، آپؑ کی ذاتِ مقدسہ سے وابستہ اسرار و معارف اور انفرادی و اجتماعی زندگی میں آپؑ کے اسوۂ عمل کو اجاگر کیا گیا ہے۔

جناب سیدہ فاطمہ زہرا سلام اللہ علیہا کی ذاتِ گرامی فضائل و کمالات، اسرار و معارف اور عظمت و منزلت کا ایک بے پایاں سمندر ہے۔ زیرِ نظر کتاب میں آپؑ کے مقام و مرتبے کے مختلف گوشوں کو نمایاں کرنے کے ساتھ ان موضوعات کا بھی جائزہ لیا گیا ہے جو معرفتِ فاطمیؑ کے فروغ اور سیرتِ اہل بیت علیہم السلام سے آگاہی کے حوالے سے اہمیت رکھتے ہیں۔

کتاب کے مختلف ابواب میں جناب سیدہ سلام اللہ علیہا کے مناقب کو آئمہ معصومین علیہم السلام کی نگاہ میں بیان کیا گیا ہے۔ اسی طرح «اسرارِ الٰہیہ کا خزانہ» کے عنوان سے آپؑ کی عظمت، جناب مریم علیہا السلام کے فضائل کے ساتھ تقابلی جائزہ، شبِ قدر اور جناب سیدہؑ کے درمیان مماثلتیں اور «ام ابیھا» و «ام الکتاب» کے مابین مماثلتوں جیسے موضوعات کو جگہ دی گئی ہے۔

کتاب میں جناب سیدہؑ اور سورۂ کوثر کے تعلق پر بھی روشنی ڈالی گئی ہے، جبکہ بیٹی، زوجہ اور ماں کی حیثیت سے آپؑ کی سیرت کے مختلف پہلوؤں کو الگ عنوان کے تحت پیش کیا گیا ہے۔ اس کے علاوہ خطبۂ فدک کے اجمالی پس منظر کو بھی مختصر انداز میں بیان کیا گیا ہے۔ اس طرح کتاب میں فضائل و مناقب، قرآنی معارف، مقامِ ولایت اور سیرتِ فاطمیؑ کے مختلف موضوعات کو یکجا کرنے کی کوشش کی گئی ہے۔

کتاب کے اہم عناوین

کتاب میں درج ذیل آٹھ موضوعات شامل ہیں:

1. جناب سیدہ سلام اللہ علیہا کے مناقب، آئمہ معصومین علیہم السلام کی نظر میں

2. جناب سیدہؑ، اسرارِ الٰہیہ کا خزانہ

3. جناب سیدہؑ اور جناب مریم علیہا السلام کے فضائل کا تقابلی جائزہ

4. جناب سیدہؑ اور شبِ قدر میں مماثلتیں

5. ام ابیھا اور ام الکتاب میں مماثلتیں

6. جناب سیدہؑ اور سورۂ کوثر

7. جناب سیدہؑ، بیٹی، زوجہ اور ماں کے روپ میں

8. خطبۂ فدک کا اجمالی پس منظر

ترتیب و تدوین اور اشاعت

کتاب کی ترتیب و تدوین مولانا مراد علی بلاغی نے انجام دی ہے، جبکہ مولانا افضل علی عسکری نے اس کی پروف ریڈنگ کی ہے۔ کتاب کے ناشر المرضیہ دارالتحقیق و تبلیغ، کراچی ہیں۔

کتاب «جناب سیدہؑ؛ اسرارِ الٰہیہ کا خزانہ» عنقریب مارکیٹ میں دستیاب ہوگی۔ کتاب حاصل کرنے اور مزید معلومات کے لیے درج ذیل پتے اور رابطہ نمبر پر رجوع کیا جا سکتا ہے۔

ناشر: المرضیہ دارالتحقیق و تبلیغ، کراچی

رابطہ نمبر:

9203008952058+