۴ اردیبهشت ۱۴۰۳ |۱۴ شوال ۱۴۴۵ | Apr 23, 2024
تنصیر حیدر

حوزہ/ مرکزی نائب صدر تنصیر حیدر کا کہنا ہے کہ ماہ صیام کے دوسرے عشرے میں قرآن کے تمسک کیلئے خصوصی محافل کا اہتمام کیا جائیگا۔ یونٹس میں خصوصی دروس ہونگے، جن میں علمائے کرام قرآن و امامت کے موضوع پر نوجوانوں کی فکری تربیت کرینگے اور نوجوانوں کو قرآن سے اپنا تعلق مضبوط کرنے کی ترغیب دی جائیگی۔

حوزہ نیوز ایجنسی کی رپورٹ کے مطابق،امامیہ اسٹوڈنٹس آرگنائزیشن پاکستان ماہِ صیام کے دوسرے عشرے کو ’’عشرہ قرآن و امامت‘‘ کے عنوان سے منائے گی۔ آئی ایس او پاکستان کے مرکزی نائب صدر تنصیر حیدر کے مطابق 15 رمضان المبارک کو ولادت حضرت امام حسن علیہ السلام کے موقع پر ڈویژنز اور یونٹس کی سطح پر جشن جبکہ 21 رمضان المبارک یوم شہادت حضرت امام علی علیہ السلام کی مناسبت سے مجالس عزاء کا اہتمام کیا جائے گا۔

انہوں نے ملک بھر میں موجود امامیہ اسکاوٹس کو ہدایت کی کہ وہ یوم علی علیہ السلام پر برآمد ہونیوالے جلوس ہائے عزاء اور مجالس عزاء کی سکیورٹی کے فرائض تندہی سے سرانجام دیں۔

لاہور میں کارکنوں سے خطاب میں تنصیر حیدر کا مزید کہنا تھا کہ ماہ صیام کے دوسرے عشرے میں قرآن کے تمسک کیلئے خصوصی محافل کا اہتمام کیا جائے گا۔ یونٹس میں خصوصی دروس ہوں گے، جن میں علمائے کرام قرآن و امامت کے موضوع پر نوجوانوں کی فکری تربیت کریں گے اور نوجوانوں کو قرآن سے اپنا تعلق مضبوط کرنے کی ترغیب دی جائے گی۔

انہوں نے کہا کہ قرآن کتاب ہدایت ہے، جس سے روشنی لے کر دنیاوی و اخروی زندگی میں کامیابی حاصل کی جا سکتی ہے۔

لیبلز

تبصرہ ارسال

You are replying to: .