حوزہ نیوز ایجنسی کے مطابق، ایس ایس پی موسیٰ خیل ایوب اچکزئی کے مطابق تمام افراد کو ٹرکوں اور مسافر بسوں سے اتار کر فائرنگ کر کے قتل کر دیا گیا۔ جن کے بارے میں بتایا جا رہا ہے کہ ان سب مقتولین کا تعلق صوبہ پنجاب سے تھا۔

انہوں نے بتایا ہے کہ مسلح افراد نے بین الصوبائی شاہراہ پر ناکہ لگا کر مسافروں کو بسوں سے اتارا۔

ایس ایس پی موسیٰ خیل نے کہا: مسلح افراد نے 10 گاڑیوں کو آگ بھی لگا دی۔ پولیس اور لیویز جائے وقوع پر پہنچ گئی ہیں، لاشوں کو اسپتال منتقل کیا جا رہا ہے۔

واضح رہے کہ ضلع موسیٰ خیل پاکستان کے صوبہ بلوچستان کی شمال مشرقی سرحد پر واقع ہے جو خیبر پختونخواہ اور پنچاب سے متصل ہے۔ یہ علاقہ بلوچستان کو پنجاب سے ملاتا ہے۔

دوسری طرف صوبہ بلوچستان میں ہی بولان کے علاقے دوزان میں ریلوے پل کو بعض شرپسند عناصر نے دھماکے سے اڑا دیا۔ جس سے کوئٹہ آنے جانے والی تمام ٹرینیں معطل ہو گئی ہیں۔