حوزہ نیوز ایجنسی کے مطابق، امت واحدہ پاکستان کے سربراہ علامہ محمد امین شہیدی نے کہا: 26 اکتوبر 2024ء کو ایران کے مختلف صوبوں میں فوجی مراکز پر ناکام حملوں کے بعد دنیا بھر میں صہیونی حکومت اور اس کے حامی امریکہ کے خلاف نفرت میں اضافہ ہوا ہے۔
انہوں نے کہا: صہیونی حکومت نے امریکی حمایت کے ساتھ ایران پر حملہ کیا۔ ایران نے حملوں کے بعد جوابی کاروائی کا اعلان کیا ہے۔ مبصرین کے مطابق اسرائیل نے ایران پر ناکام حملہ کرکے دنیا میں اپنی مزید رسوائی کا سامان فراہم کردیا ہے۔
امت واحدہ پاکستان کے سربراہ نے کہا: ایران پر حملہ ناکام ہونے کے بعد امریکہ اور اسرائیل دنیا میں مزید بے آبرو ہوگئے ہیں۔
انہوں نے صہیونی حکومت کے حملے کے بارے میں کہا: ایران کی جانب سے وعدہ صادق 2 آپریشن کے بعد دنیا میں اسرائیل کی ساکھ ختم ہوگئی۔
علامہ محمد امین شہیدی نے کہا: دنیا میں اپنی دفاعی اور فوجی طاقت کا ڈھونگ رچانے والے اسرائیل کی دفاعی کمزوریاں وعدہ صادق 2 آپریشن کے بعد کھل کر سامنے آگئیں۔ ایران نے اپنے میزائلوں کے ذریعے اسرائیل کی دفاعی طاقت کے غبارے سے ہوا نکال دی۔
انہوں نے کہا: امریکہ اور مغربی ممالک کی بے پناہ امداد کے باوجود ایران نے اپنی دفاعی طاقت سے اسرائیل کو دنیا میں بے آبرو کردیا۔ دوسری طرف اسرائیل کو غزہ میں بھی کوئی قابل ذکر کامیابی نہیں ملی۔
