جنوری 2026ء سے پاکستانی زائرین بغیر آرگنائزر گروپ عراق نہیں جا سکیں گے

حوزہ نیوز ایجنسی کے مطابق، وفاقی وزیر داخلہ پاکستان محسن نقوی کا کہنا ہےکہ آئندہ سال جنوری سے پاکستانی زائرین بغیر آرگنائزر گروپ کے عراق نہیں جا سکیں گے اور ان گروپس کو پابند کیا جائے گا کہ جو بھی لوگ ان کے ساتھ جائیں گے، ان سب کو واپس لانا لازمی ہو گا۔

رپورٹ کے مطابق تہران میں سہ ملکی کانفرنس سے خطاب کرتے ہوئے وفاقی وزیر داخلہ نے کہا: تہران میں سہ ملکی کانفرنس خوش آئند ہے، عراق اور ایران جانے والے زائرین اہم ترین ہیں۔

انہوں نے کہا: آئندہ سال جنوری سے پاکستانی زائرین بغیر آرگنائزر گروپ کے عراق نہیں جا سکیں گے اور ان گروپس کو پابند کیا جائے گا کہ جو بھی لوگ ان کے ساتھ جائیں گے، ان سب کو واپس لانا لازمی ہو گا۔

وفاقی وزیر داخلہ نے کہا: ہم لوگوں کو رجسٹر کریں گے اور وہی لوگ لوگ گروپس کی صورت میں عراق جا سکیں گے ۔ کوئی فرد انفرادی طور پر نہیں جا سکے گا، سوائے ان کے جنہیں سفارتخانہ خود خصوصی ویزا جاری کرے گا، لیکن زیادہ تر پاکستانیوں کو گروپس کے ساتھ ہی جانا ہوگا، تاکہ ہم اس غیر قانونی مسئلے کو روک سکیں جس کا عراق کو سامنا ہے یعنی وہ لوگ جو وہاں اپنی مدتِ قیام سے زیادہ عرصہ قیام پذیر ہو جاتے ہیں۔

انہوں نے مزید کہا: لوگ وہاں جا کر غیر قانونی طور پر کام شروع کر دیتے ہیں، ہمیں یہ سلسلہ بند کرنا ہوگا اور میں مکمل طور پر ان تمام لوگوں کے خلاف ہوں جو وہاں غیر قانونی طور پر قیام پذیر ہیں، لہٰذا ہمیں ایران اور عراق کی مدد درکار ہوگی تاکہ ہم اس فیصلے کو یکم جنوری 2026 سے نافذ کر سکیں۔

وفاقی وزیر داخلہ پاکستان محسن نقوی نے کہا: ایران اور عراق جس طرح لاکھوں زائرین کی دیکھ بھال کر رہے ہیں اس پر ہم ان کا شکریہ ادا کرتے ہیں۔