حوزہ نیوز ایجنسی کی رپورٹ کے مطابق، مرحوم آیت اللہ عزیز اللہ خوشوقت (حوزہ علمیہ کے استادِ اخلاق) نے اپنے ایک درسِ اخلاق میں "خواہشاتِ نفسانی اور لمبی امیدیں" کے موضوع پر گفتگو کی، جس کا خلاصہ درج ذیل ہے:
حضرت علی علیہ السلام فرماتے ہیں: «إنّ أخوف ما أخاف علیکم اثنتان: طول الأمل واتّباع الهوی». "میں تمہارے بارے میں جن دو چیزوں سے سب سے زیادہ ڈرتا ہوں وہ ہیں: لمبی امیدیں اور خواہشاتِ نفس کی پیروی۔"
انسان جب زندگی میں آگے بڑھتا ہے، تجربات حاصل کرتا ہے اور مختلف چیزوں سے لطف اندوز ہوتا ہے تو کئی چیزوں کی طرف دل مائل ہونے لگتا ہے۔
اچھی خوراک، مزیدار پھل، خوشنما لباس اور دل لبھانے والی چیزیں اس کے ذہن میں جمع ہو جاتی ہیں۔ پھر وہ ہمیشہ بہتر اور زیادہ لذت دینے والی چیز کی تلاش میں رہتا ہے۔
یہ چاہتیں آہستہ آہستہ بڑھتی ہیں اور انسان کی زندگی پر حاوی ہو جاتی ہیں۔ اس موقع پر اکثر وہ یہ نہیں سوچتا کہ یہ کام درست ہے یا غلط، نقصان دہ ہے یا فائدہ مند؛ بس دل کی چاہت کے پیچھے چلتا ہے۔ یہی "ہوائے نفس" ہے۔
لیکن بعض خواہشات ایسی ہیں جنہیں خدا نے حرام قرار دیا ہے۔ انسان چاہے کہ ان سے لذت اٹھائے، مگر خدا کہتا ہے: "نہیں، یہ جائز نہیں۔" یہی مقام اصل امتحان ہے۔ اگر انسان ان حرام خواہشات کو چھوڑ دے اور صرف حلال چیزوں سے فائدہ اٹھائے تو اس کا عمل اسلامی ہوگا۔
لیکن اگر نفس کے پیچھے لگ گیا تو وہ آہستہ آہستہ کمزور ہوتا جائے گا، یہاں تک کہ حرام کو چھوڑنا مشکل سے مشکل تر ہو جائے گا۔ پھر انسان بڑی مصیبتوں میں مبتلا ہو جاتا ہے۔
اسی لیے حضرت علیؑ نے فرمایا: "میں تمہارے بارے میں دو چیزوں سے سخت خوفزدہ ہوں: ایک خواہشاتِ نفس کی پیروی اور دوسرے لمبی امیدیں۔"
لہٰذا اگر انسان صحت مند اور پاکیزہ زندگی گزارنا چاہتا ہے تو ضروری ہے کہ وہ حرام خواہشات سے بھی بچے اور غیر حقیقی و لمبی امیدوں سے بھی۔
آپ کا تبصرہ