دنیا ایک عارضی ٹھکانہ اور برزخ کی جانب سفر کا وسیلہ ہے

حوزہ نیوز ایجنسی کی رپورٹ کے مطابق، ایران کے شہر اراک میں واقع مدرسۂ علمیہ فاطمہ الزہراءؑ میں برزخ کے موضوع پر اخلاقی نشست منعقد ہوئی۔ اس نشست میں نمائندہ ولی فقیہ برائے صوبۂ مرکزی آیت‌ اللہ دری نجف‌آبادی نے خطاب کیا۔

آیت‌ اللہ دری نجف‌ آبادی نے امام جعفر صادق علیہ السلام سے منقول ایک معتبر حدیث بیان کرتے ہوئے کہا کہ انسان دنیا میں ایک عارضی قیام پر ہے اور یہ پوری زندگی برزخ کی طرف ایک سفر ہے۔

انہوں نے فرمایا کہ امام صادق علیہ السلام اس روایت کی شرح میں فرماتے ہیں: "اے لوگو! تم ایک عارضی گھر میں زندگی بسر کر رہے ہو؛ تم سب مسافر ہو اور یہ زمین ایک سواری کی مانند ہے جو تمہیں تمہارے اصل مقام، یعنی برزخ، تک پہنچاتی ہے۔"

نمائندۂ ولی فقیہ نے عمر کی تیزی سے گزرنے کی طرف اشارہ کرتے ہوئے کہا کہ رات اور دن کا گزرنا انسان کے محدود وقت کا سب سے بڑا پیغام ہے۔ جس طرح نیا پرانا ہوتا ہے اور سبز درخت ایک دن پیلا پڑ جاتا ہے، اسی طرح زندگی بھی اپنے سفر کے مراحل تیزی سے طے کر رہی ہے۔

انہوں نے مزید کہا کہ آخرت کا سفر نہایت طویل ہے، اس لیے ضروری ہے کہ انسان اپنے اعمال، کردار اور نیکیوں کے ذریعے اس سفر کی ضروریات ابھی سے تیار کرے، کیونکہ موت کے بعد ہر انسان کو اس دنیا سے جدا ہونا ہی ہے۔

آیت‌ اللہ دری نجف‌ آبادی نے قرآنِ کریم کو انسان کی نجات کا واحد حقیقی راستہ قرار دیتے ہوئے کہا کہ امام جعفر صادق علیہ السلام کے مطابق: "قرآن شفیع بھی ہے اور گواہی دینے والا بھی؛ عمل کرنے والوں کا محافظ اور عمل ترک کرنے والوں کے خلاف شکایت کرنے والا بھی۔ یہی کتاب حق و باطل اور خیر و شر کے درمیان واضح حد فاصل ہے اور آیات ربّانی میں سے ایک عظیم نشانی ہے۔"

انہوں نے آخر میں طلاب کو قرآن سے زیادہ انس، تدبر اور اس کی اخلاقی تعلیمات پر عمل کی تلقین کرتے ہوئے کہا کہ خوبصورت تلاوت کے ساتھ قرآن کو سمجھنا اور اس پر عمل کرنا ہی حقیقی ہدایت کا راستہ ہے۔