حوزہ نیوز ایجنسی کی رپورٹ کے مطابق، آندھراپردیش کے شہر وجے واڑہ کے علاقہ باواجی پیٹ، گاندھی نگر میں واقع سینٹ پیٹرز لوتھرن چرچ (ایسٹ پیرش) میں کرسمس کی تقریبات کے موقع پر شیعہ اور عیسائی برادری کے مابین اتحاد، بھائی چارے اور باہمی احترام کا قابلِ تحسین مظاہرہ دیکھنے میں آیا، جس نے امن، محبت اور انسانی یکجہتی کا پیغام عام کیا۔
کرسمس کے پُرمسرت موقع پر منعقدہ اس تقریب میں مولانا مرزا ظہیر عباس امام جمعہ و الجماعت شیعہ جامعہ مسجدِ حسینؑ وجے واڑہ اور مسجد حسین کمیٹی کے اراکین نے خصوصی شرکت کی۔ اس موقع پر چرچ سے مربوط افراد کی خدمت میں مبارکباد پیش کی گئی اور اس بات پر زور دیا کہ مذہب انسان کو نفرت نہیں بلکہ محبت، امن اور خدمتِ انسانیت کا درس دیتا ہے۔
مولانا مرزا ظہیر عباس نے اپنے خیالات کا اظہار کرتے ہوئے کہا کہ اسلام تمام مذاہب کے احترام اور بقائے باہمی کا داعی ہے، اور حضرت عیسیٰ علیہ السلام کی تعلیمات صبر، محبت اور انسان دوستی کا روشن نمونہ ہیں۔ انہوں نے کہا کہ آج کے پُرآشوب دور میں بین المذاہب ہم آہنگی وقت کی اہم ترین ضرورت ہے۔
چرچ کے منتظمین نے مسجدِ حسینؑ کمیٹی اور شیعہ برادری کی شرکت کو خیرسگالی اور سماجی ہم آہنگی کی ایک مثبت مثال قرار دیا۔ اس موقع پر امن، رواداری اور مذہبی ہم آہنگی کے فروغ کے لیے مشترکہ کوششیں جاری رکھنے کے عزم کا بھی اظہار کیا گیا۔
یہ تقریب اس حقیقت کی غماز ہے کہ مختلف مذاہب کے ماننے والے اگر ایک دوسرے کے عقائد کا احترام کریں تو معاشرہ امن، محبت اور بھائی چارے کا گہوارہ بن سکتا ہے۔
آپ کا تبصرہ