حوزہ نیوز ایجنسی کی رپورٹ کے مطابق، کاشان میں نمائندہ ولی فقیہ حجت الاسلام والمسلمین سید سعید حسینی نے محکمہ شہید و امور ایثارگران کے سربراہ کے ہمراہ دفاع مقدس کے آزاد شدہ جنگی اسیر اور جانباز حسین ملائی نوش آبادی سے ملاقات کی۔
انہوں نے شہداء کو خراج عقیدت پیش کرتے ہوئے دفاع مقدس کے دوران ان افراد کی استقامت اور صبر کو سراہتے ہوئے کہا: آپ کو 38 دیگر افراد کے ہمراہ 25 روز تک بغداد میں تین بائی چار میٹر کے ایک کمرے میں قید رکھنا بھی ایک قسم کا تشدد تھا۔
کاشان میں نمائندہ ولی فقیہ نے کہا: مسلمان جنگ کے دوران بھی جوانمردی کا مظاہرہ کرتے ہیں لیکن صدامی بعثی فوجیوں نے موسم گرما میں شدید گرمی کے دوران پنکھے بند کرکے اور بیرکوں کی کھڑکیاں بند کرکے جبکہ سردیوں میں وینٹی لیشن چلا کر، کھڑکیاں کھول کر اور پنکھے چلا کر بھی اسراء کو جسمانی اذیتیں دیں۔ بعثی فوجیوں نے مختلف قسم کے شدید تشدد کے ذریعے اپنی انتہائی بے رحمی کا مظاہرہ کیا۔
حجت الاسلام والمسلمین حسینی نے کہا: ہمارے شہید امام (رہ) نے فرمایا تھا کہ گزشتہ جنگوں کے تجربات کی بنیاد پر ہمارا خیال تھا کہ قیدیوں کا تبادلہ 20 سے 30 سال تک جاری رہ سکتا ہے لیکن آٹھ سالہ جنگ میں اللہ تعالیٰ کی تدبیر یہ تھی کہ صدام نے کویت پر حملہ کرنے کا ارادہ کیا اور اسے اپنی فوج کی ضرورت تھی، اسی وجہ سے اس نے 1369 ہجری شمسی میں ایرانی جنگی قیدیوں کو رہا کر دیا۔
انہوں نے مزید کہا: ایرانی جنگی قیدیوں کی کم سے کم مدت میں رہائی اللہ تعالیٰ کی تدبیر تھی۔
امام جمعہ کاشان نے کہا: صدام نے تین مقاصد کے تحت ہمارے ملک پر حملہ کیا تھا؛ ایران کی سرزمین پر قبضہ کرنا، نظام حکومت کو تبدیل کرنا اور اسلامی جمہوریہ کے نظریے کو خاموش کرنا۔
انہوں نے مزید کہا: اللہ تعالیٰ کے فضل و کرم سے ہمارے ملک کی ایک بالشت زمین بھی دشمن کے حوالے نہیں کی گئی۔
حجت الاسلام والمسلمین حسینی نے کہا: شہداء کی ایثار و قربانی اور آزادگان کی استقامت کی بدولت ایران کا اسلامی نظام ایک تناور درخت میں تبدیل ہو چکا ہے۔ آج انقلاب اسلامی کا نظریہ آزادی و خودمختاری، مقاومت، استقامت اور ظلم کے خلاف جدوجہد کے پیغام کے ساتھ پوری دنیا تک پہنچ چکا ہے۔
آپ کا تبصرہ