منطقی انداز میں احتجاج اور مطالبہ عوام کا حق ہے، لیکن بدامنی اور دشمن کی مدد ناقابل قبول ہے: آیت اللہ اعرافی

حوزہ نیوز ایجنسی کی رپورٹ کے مطابق، قم کے امام جمعہ آیت اللہ علی رضا اعرافی نے کہا ہے کہ عوام کو اپنے مطالبات پیش کرنے اور احتجاج کرنے کا حق حاصل ہے اور حکام کو ان کی بات سن کر مسائل حل کرنے کی کوشش کرنی چاہیے، لیکن احتجاج کی آڑ میں بدامنی پھیلانا، معاشرتی نظم خراب کرنا اور ایران کو تقسیم کرنے کے خواہاں دشمنوں کی مدد کرنا کسی صورت قابل قبول نہیں ہے۔

آیت اللہ اعرافی نے 12 رجب 1447ھ ش کو قم کے مصلی قدس میں نماز جمعہ کے خطبوں میں کہا کہ اسلامی انقلاب نے دنیا کے سامنے ایک نیا راستہ پیش کیا ہے، جس کی بنیاد اسلامی تعلیمات پر ہے۔ اس انقلاب اور ایرانی قوم کی عظمت کو سمجھنا ضروری ہے۔

انہوں نے کہا کہ دشمن ایک وسیع فکری جنگ کے ذریعے نوجوان نسل کے ذہنوں کو نشانہ بنا رہا ہے۔ سوشل میڈیا اور دیگر ذرائع سے ملک کی کامیابیوں کو کم اور کمزوریوں کو بڑھا چڑھا کر پیش کیا جا رہا ہے۔ اس کے بعد دشمن نے 12 روزہ جنگ مسلط کی، جس میں ایرانی قوم نے اپنی طاقت اور اتحاد کا مظاہرہ کیا۔ اب دشمن اقتصادی دباؤ کے ذریعے ایران کو نقصان پہنچانے کی کوشش کر رہا ہے۔

انہوں نے کہا کہ ملک میں مہنگائی، کرنسی کی قیمت اور دیگر معاشی مسائل موجود ہیں، جنہیں حل کرنا حکام کی ذمہ داری ہے۔ حکومت کو عوام کے جائز مطالبات پر توجہ دینی چاہیے اور ان مسائل کے حل کے لیے سائنسی، عملی اور ملکی حالات کے مطابق اقدامات کرنے چاہئیں۔ معیشت کو مضبوط بنانے کے لیے عوام کا تعاون بھی ضروری ہے۔

آیت اللہ اعرافی نے کہا کہ دشمن یہ نہ سمجھے کہ عوامی احتجاج اس کے لیے ایران میں مداخلت کا راستہ کھول دے گا۔ ایرانی قوم اپنے ملک اور انقلاب کے دفاع میں متحد ہے اور دشمنوں کے عزائم کو کامیاب نہیں ہونے دے گی۔

اعتکاف اور دینی تعلیم کی اہمیت

انہوں نے ماہ رجب کی عبادتوں اور اعتکاف کی اہمیت بیان کرتے ہوئے کہا کہ ملک کی 10 ہزار مساجد میں تقریباً 15 لاکھ افراد کی میزبانی میں اعتکاف کا انعقاد قابل قدر ہے۔ اعتکاف نوجوانوں کو روحانیت، اخلاق اور خود سازی کی طرف متوجہ کرتا ہے اور انہیں معاشرے کی خدمت کے لیے تیار کرتا ہے۔

انہوں نے آیت اللہ مصباح یزدی کی برسی کے موقع پر اسلامی علوم اور انسانی علوم کو اسلامی تعلیمات کے مطابق فروغ دینے کی ضرورت پر بھی زور دیا۔

حکمرانی میں عوام کے حقوق

آیت اللہ اعرافی نے پہلے خطبے میں نہج البلاغہ کے حوالے سے کہا کہ امام علی علیہ السلام نے حکومت اور عوام کے تعلقات میں دونوں کے حقوق کو واضح کیا ہے۔ حکمرانوں اور عوام کے ایک دوسرے پر حقوق ہیں اور معاشرے کا نظام انہی حقوق کی ادائیگی سے مضبوط ہوتا ہے۔

انہوں نے جنگ صفین کا ذکر کرتے ہوئے کہا کہ اس جنگ میں غلط فہمی، فریب اور حالات کو درست طور پر نہ سمجھنے کے باعث حق کا محاذ نقصان سے دوچار ہوا۔ اس واقعے سے سبق ملتا ہے کہ اہم حالات میں بصیرت، اتحاد اور درست فیصلے ضروری ہیں۔