حوزہ نیوز ایجنسی کی رپورٹ کے مطابق، پیروان ولایت جموں و کشمیر نے شب برائت اور ولادت باسعادت منجی عالم بشریت حضرت امام مہدی عجل اللہ فرجہ کی عظیم مناسبتوں پر عالم بشریت بالخصوص امت مسلمہ کو مبارکباد پیش کیا ہے ایک مشترکہ بیان میں تنظیم کے سربراہ مولانا سبط شبیر قمی اور صدر مولانا شبیر احمد صوفی نے پندرہ شعبان کی دو عظیم مناسبتوں پر تبریک و تہنیت پیش کرتے ہوئے عالم اسلام سے التماس کیا ہے کہ وہ کورونا وائرس جیسی مہلک بیماری کے علاوہ درپیش دیگر مسائل و مشکلات کے لئے اپنے گھروں میں خصوصی دعاؤں کا اہتمام کریں ۔انہوں نے کہا کہ موجودہ تشویشناک حالات میں صحت ماہرین اور انتظامیہ کے ہدایات پر عمل پیرا ہوجائیں اور اپنے ہی گھرانوں میں خدا کی بارگاہ میں سر بہ سجود ہوکر یہ رات عبادت الہی میں گزاریں۔ انہوں نے کورونا وائرس کے حوالے سے نمائندہ مقام معظم رہبری در ہند حجتہ الاسلام والمسلمین آقائی مہدوی پور کے ہدایات پر عمل پیرا ہونے کی پرزور تلقین کی اور کہا کہ سہم امام اور سہم سادات کے حوالے سے نمائندہ ولی فقیہ کی ہدایات کے مطابق اپنے علاقہ جات میں مستحق افراد کی مدد کریں تاکہ ان مشکل حالات میں کوئی بھوکا پیاسا نہ رہے انہوں نے ملت اسلامیہ سے کشمیر سے اپیل کی کہ وہ اپنی مدد آپ کے تحت تمام تر اقدامات اٹھائے لیکن اس سلسلے میں سوشل میڈیا پر تشہیر کے بجائے خوشنودی محمد و آل محمد حاصل کریں ۔تنظیم نے اپنے تمام اراکین سے اپیل کی کہ وہ اپنی مدد آپ کے تحت ہمہ اپنی بھر پور ذمہ داریاں نبھائیں اور ہمہ وقت خدمت خلق کے لیے تیار رہیں لیکن خدمت خلق کے جذبہ سے سوشل میڈیا کو کوسوں دور رکھیں ۔مولانا قمی اور مولانا صوفی نے مہلک وبا کے خاتمہ کے لیے دعا کی ۔