حوزہ نیوز ایجنسی کی رپورٹ کے مطابق، عشرۂ کرامت کی مناسبت سے جامعہ المصطفیٰ کے ہندوستان میں نمائندہ حجت الاسلام شاکری نے قم المقدسہ میں معروف دینی درسگاہ مدرسہ علوی کا دورہ کیا، اس موقع پر انہوں نے مدرسے کی خدمات کو سراہا۔
نشست کا باقاعدہ آغاز حافظ و قاری حجت الاسلام والمسلمین جنت حسین نقوی نے تلاوت قرآن مجید سے کیا، جبکہ مدرسہ کے بانی حجت الاسلام والمسلمین مولانا سید مسعود اختر رضوی نے قرآنی تعلیم اور ضرورت پر روشنی ڈالی۔
حجت الاسلام والمسلمین مولانا اقبال حیدر حیدری نے گفتگو کرتے ہوئے طلاب کی تہذیب اور تربیت کی اہمیت کو بیان کیا۔
مدیر مدرسہ حجت الاسلام حافظ و قاری ڈاکٹر سید مجتبیٰ رضوی نے بیان کیا کہ ہندوستان جیسے بڑے ملک سے مزید طلاب کو قم آنا چاہیئے۔
حجت الاسلام والمسلمین مولانا سید تمیز الحسن رضوی نے مدارس کی مشکلات کا ذکر کیا اور انہیں حل کرنے کی تاکید کی۔
ہندوستان میں جامعہ المصطفیٰ کے نمائندے حجت الاسلام شاکری نے ہندوستان کے دینی مدارس کی کچھ کمیوں کا ذکر کیا اور مدارس کو مستحکم و منظم کرنے پر زور دیا نیز مدرسہ علمیہ علوی کی تعریف و تمجید کی اور کہا کہ تنہا مدرسہ ہے جو دینی علوم کے ساتھ حفظ قرآن کریم پر کام کر رہا ہے۔
آخر میں بانی مدرسہ نے حاضرینِ جلسہ خاص طور سے شاکری صاحب کا شکریہ ادا کیا۔
