حوزہ نیوز ایجنسی کی رپورٹ کے مطابق، وفاق المدارس الشیعہ پاکستان کے سیکریٹری جنرل علامہ افضل حیدری نے اسٹیٹ بینک آف پاکستان اور الصادق انسٹیٹیوٹ آف اسلامک بینکنگ، فنانس اینڈ تکافل کے اشتراک سے جامعہ المنتظر میں علماء اور طلباء و طالبات کے ٹریننگ سیشن سے خطاب کرتے ہوئے کہا ہے کہ اسلام مکمل ضابطہ حیات ہے، جس میں زندگی کے تمام اجتماعی اور انفرادی پہلوؤں کا حل موجود ہے، کوئی ایسا پہلو نہیں ہے کہ جس میں شریعت نے راستہ نہ بتایا ہو؛ اللہ تعالیٰ نے اسلام کو پسندیدہ دین قرار دیا ہے، اس میں اسلامی بینکاری بھی ایک شعبہ ہے۔

انہوں نے مزید کہا کہ ایک عرصے سے مسلمانانِ پاکستان کا مطالبہ تھا کہ سودی نظام سے نجات دلائی جائے، لیکن کوئی راستہ نہیں نکل رہا تھا؛ تمام مکاتب اسلامی کے علماء کی جدوجہد سے وفاقی شرعی عدالت نے سودی نظام کے خاتمے کا حکم دے کر ایک راہ متعین کردی ہے، جبکہ پارلیمنٹ نے بھی طے کر دیا ہے کہ 31 دسمبر 2028 تک اسٹیٹ بینک آف پاکستان اپنی تیاریاں مکمل کر لے گا؛ یکم جنوری 2029 سے تمام بینکوں میں بلا سود بینکاری نافذ ہو جائے گی، جس کی وجہ سے آئندہ کے چیلنجوں کے لیے علماء کو تیار کیا جا رہا ہے؛ ہر بینک کی ایڈوائزری کونسل اور شریعہ بورڈ میں علماء موجود ہوں گے اور تمام مکاتبِ فکر سے ہوں گے، ہو سکتا ہے کہ کسی برانچ میں بھی علماء کی ضرورت ہو جو نگرانی کریں کہ بینکاری اسلامی نظام کے مطابق ہے بھی یا نہیں۔

علامہ افضل حیدری نے کہا کہ ہم اسلامی بینک کاری کی کلاسیں بھی شروع کریں گے؛ الصادق انسٹیٹیوٹ آف اسلامک بینکنگ، فنانس و تکافل سے مولانا مظہر حسین نے کہا کہ اسلام کا اصول ہے کہ پورے کے پورے دین میں داخل ہو جاؤ صرف نماز اور روزہ ہی دین نہیں ہے، معیشت اور لین دین کے معاملات بھی اسلام کے مطابق طے ہونے چاہیئں؛ خوش آئند بات ہے کہ اسلامی بینکاری شروع ہوئی ہے جو کہ ایک بہت بڑی تبدیلی ہے۔

انہوں نے مزید کہا کہ یہ 1980ءکی طرح صرف نام کی تبدیلی نہیں، بلکہ اب باقاعدہ طور پر تیاری کی جا رہی ہے، اسلامی بینکاری کے پروڈکٹس تیار کیے جارہے ہیں، اس حوالے سے حکومتی سرپرستی اور آمادگی کی بہت زیادہ اہمیت ہے۔ قابلِ ستائش ہے کہ حکومت نے فیڈرل شریعت کورٹ کے حکم پر عمل درآمد کر رہی ہے۔

انہوں نے مزید کہا کہ 26ویں آئینی ترمیم کے بعد بلا سود معیشت کو لازمی قرار دیا گیا ہے، جسے مکمل کرنا ہے۔

اسٹیٹ بینک آف پاکستان کے افسران سرفراز احمد، مقصود احمد بھٹی اور ثنائی، بینک الحبیب سے انصر زیدی، افتخار اشتیاق نے بھی مدارس کے طلبا و طالبات کو ٹریننگ دی۔

اس اجلاس میں علامہ مرید نقوی، علامہ مہدی حسن، مولانا محمد تحسین، مولانا غلام مصطفی نیر، مولانا اعجاز حیدری، مولانا لعل حسین توحیدی اور دیگر نے بھی شرکت کی۔