حوزہ نیوز ایجنسی کی رپورٹ کے مطابق، چیئرمین مجلس وحدت مسلمین پاکستان سینیٹر علامہ راجہ ناصر عباس جعفری نے میڈیا سیل سے جاری اپنے بیان میں بلوچستان میں جعفر ایکسپریس پر بزدلانہ دہشت گرد حملے کی شدید مذمت کی ہے، جس میں معصوم شہریوں کو یرغمال بنایا گیا ہے اور سیکیورٹی فورسز کے 11 بہادر جوانوں کو بے دردی سے شہید کر دیا گیا ہے، یہ سفاکانہ کارروائی انسانیت اور امن کے دشمنوں کی گھناؤنی سوچ کی عکاس ہے، بلوچستان میں بگڑتی ہوئی صورتحال ہم سب کے لیے لمحۂ فکریہ ہے، اب بھی وقت ہے کہ تمام سیاسی قیادت سنجیدگی کا مظاہرہ کرے اور قومی سلامتی کے لیے متحد ہو کر عملی اقدامات اٹھائے۔

انہوں نے کہا کہ میں اہلِ پاکستان سے اپیل کرتا ہوں کہ افطار کے وقت یرغمالیوں کی سلامتی وبحفاظت بازیابی اور شہداء کے بلند درجات کے لیے دعا کریں، ملکی حالات کی سنگینی سے آنکھیں چرانا دانشمندی نہیں ہے، چاہے وہ کے پی کے ہو بلوچستان ہو یا پھر سندھ پنجاب بارڈر ہو، اللہ تعالیٰ ہمارے ملک پاکستان پر اپنا خاص رحم و کرم فرمائے اور پورے ملک کو امن و استحکام نصیب کرے۔ الٰہی آمین!