حوزہ نیوز ایجنسی کی رپورٹ کے مطابق؛ عراقی وزیر کھیل نے بروز جمعرات حرم امام رضا علیہ السلام کی زیارت کرنے کے بعد خراسان رضوی کے ایتھلیٹکس کھیلوں کے بورڈ کے ڈائریکٹر اور رضوی میوزیم کے سربراہان کے ہمراہ میوزیم کا وزٹ کیا، اس وفد نے شبِ جمعہ امام رضا(ع) کے متبرک دسترخوان پر کھانا بھی تناول فرمایا۔
واضح رہے کہ امام رضا (ع) کپ کے چوتھے بین الاقوامی ٹریک اینڈ فیلڈ مقابلے بروز جمعہ اور ہفتہ کو منعقد کئے جائیں گے، جن میں ایتھلیٹکس کے 145 مرد کھلاڑی شرکت کریں گے، جن میں سے 45 کھلاڑی ایرانی اور 80 کھلاڑی غیر ملکی ہیں۔
حرم امام رضا علیہ السّلام کے فزیکل ایجوکیشن انسٹیٹیوٹ کے ڈائریکٹر اور صوبۂ خراسان رضوی کی ایتھلیٹکس کمیٹی کے سربراہ جناب رضا امین زادہ نے بتایا کہ جمعہ کے دن بوقت عصر چار بجے ایران کے 25 تجربہ کار اور ماہر صحن جمہوری میں امام رضا (ع) کی بارگاہ میں عقیدت کا اظہار کرنے کے بعد آیت اللہ واعظ طبسی روڈ سے امام رضا (ع) اسٹیڈیم کی جانب پیدل چلے۔
یہ بات قابلِ ذکر ہے کہ امام رضا (ع) اسٹیڈیم جو مغربی ایشیاء کا جدید ترین اسٹیڈیم ہے اور اس میں 25 ہزار نشستیں پائی جاتی ہیں، اس کے علاوہ اس کے تارتان پیسٹ پر ایتھلیٹکس کے مختلف کھیلوں کے لئے 8 لائنز موجود ہیں۔
رپورٹ کے مطابق، عراقی وزیر کھیل جناب احمد محمد حسین قاسم المبرقع دونوں ممالک کے مابین کھیلوں کے مشترکہ مذاکرات کے لئے ایران تشریف لائے تھے، اس دوران انہوں نے مشہد مقدس میں تعینات عراقی کونسلر کے ہمراہ دو گھنٹے تک امام رضا(ع) اسٹیڈیم کا دورہ کیا۔
اس دورے کے دوران حرم امام رضا علیہ السّلام کے فزیکل ایجوکیشن انسٹیٹیوٹ کے سربراہ کے ساتھ ایک نشست بھی منعقد ہوئی، جس میں عراقی وزیر کھیل کو ایران کے ہینڈی کرافٹ کا ایک قیمتی پینٹنگ بورڈ اور اس انسٹیٹیوٹ کا خصوصی نشان ہدیہ کے طور پر پیش کیا، عراقی وزیر کھیل جناب احمد محمد حسین قاسم المبرقع نے بھی عراق کی وزارت کھیل کی جانب سے ایک یادگاری شیلڈ پیش کی۔
عراقی وزیر کھیل نے اسٹیڈیم کے مختلف حصوں کا وزٹ کیا اور اس اسٹیڈیم میں پائی جانے والی سہولیات کو سراہا۔
جناب احمد محمد حسین قاسم المبرقع نے بتایا کہ میرے اس سفر کا مقصد کھیلوں کے حوالے دونوں ممالک کے مابین مشترکہ مذاکرات تھے، جو کامیابی سے طے پائے ہیں۔
انہوں نے گفتگو کو جاری رکھتے ہوئے کہا کہ اس سفر کے دوران امام رضا(ع) کی زیارت سے بھی مشرف ہوا ہوں اور حرم امام رضا (ع) کے میوزیم کا بھی وزٹ کیا ہے۔
آخر میں ان کا کہنا تھا کہ اس قرارداد اور دو طرفہ مذاکرات سے دونون ممالک کے مابین کھیلوں کو فروغ ملے گا۔
آپ کا تبصرہ