حوزہ نیوز ایجنسی کی رپورٹ کے مطابق، جونپور کے ضلع اسپتال میں حسینی بلڈ ڈونرز ایسوسی ایشن کے زیرِ اہتمام خون عطیہ کیمپ منعقد ہوا، جس میں نوجوانوں اور سماجی کارکنوں نے بڑھ چڑھ کر حصہ لیا اور خون دے کر انسانیت کی خدمت کا عملی ثبوت پیش کیا۔
بدھ کے روز ضلع اسپتال کے بلڈ بینک میں حسینی بلڈ ڈونرز ایسوسی ایشن کے زیرِ اہتمام ایک بامقصد اور بامعنی خون عطیہ کیمپ کا انعقاد کیا گیا جس میں نوجوانوں اور سماجی کارکنوں کی بڑی تعداد نے بڑھ چڑھ کر حصہ لیا اور خون دے کر کئی زندگیاں بچانے کا عہد کیا۔
اس کیمپ کا افتتاح جامعہ امام صادق علیہ السلام کے سربراہ حجۃ الاسلام و المسلمین مولانا سید صفدر حسین زیدی نے کیا۔ انہوں نے اپنے خطاب میں کہا: “ایک بوتل خون چار انسانوں کو نئی زندگی دے سکتا ہے، یہ سب سے بڑا صدقہ و خیرات ہے جو براہِ راست انسانیت کو زندہ رکھتا ہے۔”
مولانا نے کہا کہ حسینی خون ہمیشہ انسانیت کی خدمت میں بہتا رہا ہے اور آج کے دور میں بھی اسی جذبے کو آگے بڑھانے کی ضرورت ہے۔
تقریب میں موجود سینئر معالج ڈاکٹر سیف خان نے نوجوانوں کو بتایا کہ خون دینا نہ صرف دوسروں کی جان بچاتا ہے بلکہ دینے والے کی صحت کے لئے بھی فائدہ مند ہے، کیونکہ اس سے خون کی نئی گردش اور خلیوں کی افزائش تیز ہوتی ہے۔
ایسوسی ایشن کے صدر سید حسن مہدی نے کہا: “خون دینا سب سے بڑی خیرات ہے، یہ دوسروں کو زندگی دینے کا ذریعہ ہے اور ہمیں اس مشن کو مزید عام کرنا ہوگا۔”
اس موقع پر ایسوسی ایشن کے سیکریٹری و صحافی عارف حسینی، نائب صدر سید مشران جعفری، سید شہنشاہ حیدر، سید محمد عباس ثمر، صادق رضوی، عنبر عباس خان، نوشاد، سنجے، جاوید اور دیگر نوجوانوں نے خون دے کر ایک شاندار مثال قائم کی۔
یہ کیمپ اس پیغام کے ساتھ اختتام پذیر ہوا کہ انسانیت کی خدمت ہر مذہبی اور سماجی حد سے بالاتر ہے، اور جونپور میں حسینی بلڈ ڈونرز ایسوسی ایشن کی یہ کاوش معاشرے کے لئے ایک روشن مشعلِ راہ بن گئی ہے، جہاں ہر بوند خون انسانیت کی بقا کا ضامن ہے۔
آپ کا تبصرہ