مشکلات میں امام زمانہ (عج) سے مدد اور رابطہ کیسے حاصل کریں؟

حوزہ نیوز ایجنسی کی رپورٹ کے مطابق، حجت الاسلام والمسلمین مهدی یوسفیان، کارشناسِ مرکز تخصصی مهدویت نے ’’امام زمانہ (عج) سے رابطے کا طریقہ؛ مشکلات میں سکون‘‘ کے موضوع پر گفتگو کی ہے، جو آپ کی خدمت میں پیش ہے۔

بسم اللہ الرحمن الرحیم

امام زمانہ علیہ السلام کے خطوط کے بارے میں چند اہم نکات قابلِ توجہ ہیں۔ عام طور پر امام مهدی علیہ السلام کے خطوط کے لیے توقیع کا لفظ استعمال ہوتا ہے۔

امام زمانہ (عج) کے توقیعات دو قسم کے ہیں:

1. وہ خطوط جو لوگ امام کو لکھتے تھے

یہ خطوط امام تک نوّابِ خاص کے ذریعے پہنچتے تھے۔ امام علیہ السلام ان خطوط کے نیچے جواب تحریر فرماتے اور نواب ان جوابات کو دوبارہ لوگوں تک پہنچاتے تھے۔

2. وہ خطوط جو خود امام مهدی علیہ السلام کی طرف سے صادر ہوتے تھے

یہ خطوط براہِ راست امام کی جانب سے ہوتے اور لوگوں تک پہنچائے جاتے۔

مرحوم شیخ مفید نواب خاص کے زمانے میں موجود نہیں تھے، وہ کئی سال بعد پیدا ہوئے۔ اس لیے سوال پیدا ہوتا ہے کہ امام کے خطوط شیخ مفید تک کیسے پہنچے؟

تحقیقات سے معلوم ہوتا ہے کہ زمانۂ نیابتِ خاص میں بھی کبھی کبھار امام علیہ السلام اپنی مصلحت سے براہِ راست بعض افراد کو خطوط ارسال فرماتے تھے۔

لہٰذا شیخ مفید کی طرف منسوب خطوط بھی غالباً اسی قسم کے ہیں۔

امام علیہ السلام کو شیخ مفید کے علم، مقام اور شیعہ معاشرے میں اُن کی اثرگذاری کی وجہ سے ان سے خاص محبت و توجہ تھی۔ اسی وجہ سے شیخ مفید کی وفات کے بعد ایک توقیع عام لوگوں تک پہنچی اور مشہور ہوئی۔

اگرچہ بعض افراد دو سو سالہ فاصلے اور نوابِ خاص کے نہ ہونے کی وجہ سے ان خطوط پر شبہ کرتے ہیں، مگر تاریخی شواہد امام کی خصوصی عنایت کی تائید کرتے ہیں۔

سوال: ہم امام زمانہ (عج) سے کیسے رابطہ قائم کریں تاکہ مشکل حالات آسانی سے برداشت ہو سکیں؟

جواب:

۱. دنیا کی سختیوں کو حقیقت سمجھ کر قبول کرنا

امام زمانہ (عج) کا ظہور یا اُن سے رابطہ یہ نہیں کہ تمام مشکلات ختم ہو جائیں، بلکہ یہ دل کو طاقت دیتا ہے کہ ہم ان سختیوں کو بہتر انداز سے برداشت کر سکیں۔

۲. امام زمانہ (عج) خدا سے ہمارا رابطہ ہیں

امام خدا کے خلیفہ اور اس کے حجت ہیں۔ وہ ہمیں خدا سے جوڑنے کے لیے رہنمائی کرتے ہیں۔ اس لیے امام کی توجہ اور تعلیمات مشکلات میں ہمارے لیے بڑی مددگار ہوتی ہیں۔

۳. دعا اور زیارت کا سہارا

زیارت آلِ یاسین جیسی زیارتیں پڑھ کر دل کو سکون ملتا ہے۔ صرف امام کو سلام کہنا بھی دل کو اطمینان دیتا ہے۔ نمازِ استغاثہ بہ امام زمانہ (دو رکعت) اور اس کے بعد مختصر دعا، انسان کے اندر روحانی سکون اور امام سے قلبی وابستگی پیدا کرتی ہے۔

۴. معرفتِ امام کو بڑھانا

امام سے گہرا رابطہ معرفت کا محتاج ہے۔

معرفت انسان کے دل میں محبت، یقین اور اخلاص پیدا کرتی ہے، جس سے اعمال بھی خدا کی رضا کے لیے مزید خالص ہو جاتے ہیں۔

امام حسن علیہ السلام کا ایک خوبصورت ارشاد:

ایک شخص شدید تکلیف میں مبتلا تھا۔

امام حسن علیہ السلام نے فرمایا: ’’اگر تم یقین رکھتے ہو کہ اللہ سب سے زیادہ مہربان ہے اور بندوں کے لیے ہمیشہ بہترین چاہتا ہے، تو پھر یہ حالت جس میں تم ہو—تمہارے لیے اسی وقت بہترین فیصلہ ہے۔‘‘

اس حقیقت کو سمجھ لینے سے انسان مشکلات کو آسانی سے برداشت کر لیتا ہے، کیونکہ اسے یقین ہوتا ہے کہ امام زمانہ (عج) اس کے ساتھ ہیں، اور بہت سی بلائیں اور تکلیفیں اسی عنایتِ امام کی وجہ سے ہم تک پہنچنے سے پہلے ہی ٹل جاتی ہیں۔

نتیجہ

دعا، زیارت اور امام زمانہ (عج) کے ساتھ روحانی توجہ کے ذریعے دل کو سکون ملتا ہے اور معرفت میں اضافہ ہوتا ہے۔

جب انسان یہ حقیقت سمجھ لے کہ امام کی نگاہِ لطف ہر لمحہ اُس پر ہے، تو دنیا کی سختیاں بہت ہلکی محسوس ہونے لگتی ہیں۔