اسوۂ حسنہ منزل ہے جس کا راستہ بیت فاطمہ سلام الله علیہا ہے: مولانا سید رضا حیدر زیدی

حوزہ نیوز ایجنسی کی رپورٹ کے مطابق، حجت الاسلام والمسلمین مولانا سید رضا حیدر زیدی پرنسپل حوزہ علمیہ غفرانمآب رحمۃ الله علیہ لکھنؤ نے لکھنؤ میں نمازِ جمعہ کے اجتماع سے خطاب میں ولادتِ باسعادت حضرت فاطمہ زہراء سلام الله علیہا کی مناسبت سے مبارکباد پیش کرتے ہوئے کہا کہ اسوۂ حسنہ منزل ہے جس کا راستہ سیدہ فاطمہ زہراء کا گھر ہے۔

مولانا سید رضا حیدر زیدی نے نمازیوں کو تقوائے الٰہی اختیار کرنے کی نصیحت کرتے ہوئے کہا کہ ہمیں زندگی کے ہر لمحے میں تقویٰ کا خیال رکھنا چاہیے اور دعا کرنی چاہیے کہ یہ تقویٰ ہمیشہ باقی رہے۔

مولانا سید رضا حیدر زیدی نے سورۂ احزاب آیت 21 "بے شک تمہارے لیے پیغمبرِ اسلام (صلی الله علیہ و آلہ وسلم) کی ذات میں (پیروی کیلیے) بہترین نمونہ موجود ہے۔ ہر اس شخص کیلیے جو اللہ (کی بارگاہ میں حاضری) اور قیامت (کے آنے) کی امید رکھتا ہے اور اللہ کو بکثرت یاد کرتا ہے۔" کو بیان کرتے ہوئے کہا کہ امام زمانہ عجل اللہ فرجہ الشریف نے فرمایا: "رسول اللہ صلی اللہ علیہ وآلہ کی بیٹی ہمارے لئے بہترین نمونۂ عمل ہیں۔" اگر ہم آیت اور حدیث پر غور کریں تو ہمارے لیے واضح ہوگا کہ حضرت فاطمہ زہرا سلام اللہ علیہا کی ذات بہترین نمونۂ عمل ہے، جن کے ذریعے نجات اور سعادت نصیب ہوگی۔

مولانا سید رضا حیدر زیدی نے مزید کہا کہ ایک منزل ہوتی ہے اور ایک راستہ ہوتا ہے، منزل پر پہنچنے کے لیے راستے کا درست استعمال ضروری ہے، اگر کوئی غلط راستے پر چلے گا تو وہ منزل سے دور ہوتا چلا جائے گا، آج ہر کوئی دعویٰ کر رہا ہے کہ "اسوۂ حسنہ" ہمارے پاس ہے، لیکن یاد رکھیں کہ اسوۂ حسنہ منزل ہے جس کا راستہ بیت فاطمہ سلام اللہ علیہا ہے۔

مولانا سید رضا حیدر زیدی نے احادیث قدسی "لا الہ الا اللہ میرا قلعہ ہے۔" اور "علی علیہ السلام کی ولایت میرا قلعہ ہے‌۔" کو بیان کرتے ہوئے کہا کہ عالم اسلام نے یہی سمجھنے میں غلطی کی اور ولایت اور توحید کو جدا سمجھا، جبکہ ولایت اور توحید جدا نہیں ہیں۔

خطبۂ فدک میں بحث و فلسفہ توحید کا ذکر کرتے ہوئے مولانا سید رضا حیدر زیدی نے کہا کہ"کلمہ لا الہ الا اللہ" کی تاویل "اخلاص" ہے، اخلاص کا روزہ سے اہم تعلق ہے اور یہی روزہ انسان کے اندر تقویٰ پیدا کرتا ہے۔ یعنی تقویٰ کا تعلق انسان کے شکم سے ہے، جس سے واضح ہوتا ہے کہ اگر پیٹ مال حرام سے بھرا ہے تو تقویٰ نہیں آ سکتا۔

مولانا سید رضا حیدر زیدی نے مزید کہا کہ اگر پیٹ مال حرام سے بھرا ہو تو چاہے کوئی "لا الہ الا اللہ" کہے یا "یا حسین (علیہ السلام)" کہے، فائدہ نہیں پہنچے گا، کیونکہ نقلی دوا فائدہ نہیں پہنچاتی ہے۔ اصلی دوا ہی فائدہ پہنچائے گی۔

آخر میں مولانا سید رضا حیدر زیدی نے کہا کہ بے شک "لا الہ الا اللہ" قلعہ ہے، "ولایت علی علیہ السلام" قلعہ ہے، "عصمت فاطمہ سلام اللہ علیہا" قلعہ ہے، ان سے جو وابستہ ہوا اسے نجات ملی، لیکن اگر پیٹ میں مال حرام ہے، دوسروں کا مال غصب کیا ہے، اوقاف کو لوٹا ہے تو زبانی نعرے لگانے سے فائدہ نہیں ہونے والا۔