حوزہ نیوز ایجنسی کی رپورٹ کے مطابق، ممبئی میں 10 محرم الحرام کے موقع پر حضرت امام حسین علیہ السلام اور شہدائے کربلا کی یاد میں سالانہ عاشورہ کا عظیم الشان جلوس انتہائی عقیدت و احترام کے ساتھ نکالا گیا، جس میں شہر بھر سے ہزاروں عزاداروں نے شرکت کی۔
جلوس کا آغاز زینبیہ امام باڑہ سے ہوا اور رحمت آباد قبرستان پر اختتام پذیر ہوا، جہاں عزاداروں نے حضرت امام حسین علیہ السلام اور شہدائے کربلا کی عظیم قربانی کو خراجِ عقیدت پیش کیا۔ اس جلوس کا اہتمام حسینی فیڈریشن نے کیا تھا۔
اس موقع پر اثنا عشری یوتھس فاؤنڈیشن (IAYF) نے اپنی "کلین جلوس مہم" کے تحت جلوس کے پورے راستے میں صفائی کے خصوصی انتظامات کیے۔ مہم کے دوران مختلف مقامات پر کچرے کے تھیلے (بن بیگز) رکھے گئے تاکہ عزادار استعمال شدہ اشیا کو ان میں ڈال کر جلوس کے راستے کو صاف رکھیں۔
شرکاء نے اس اقدام کو بھرپور سراہا اور اسے مذہبی شعور کے ساتھ سماجی ذمہ داری کی بہترین مثال قرار دیا۔ عزاداروں کے نظم و ضبط اور صفائی کے اہتمام نے یہ پیغام دیا کہ حضرت امام حسین علیہ السلام کی تعلیمات صرف ایثار و قربانی ہی نہیں بلکہ معاشرتی ذمہ داری، نظم و ضبط اور عوامی مقامات کے احترام کی بھی تلقین کرتی ہیں۔ اس طرح عاشورہ کا جلوس نہ صرف روحانی عقیدت کا مظہر بنا بلکہ شہری ذمہ داری اور صفائی کے فروغ کا بھی مؤثر نمونہ ثابت ہوا۔
آپ کا تبصرہ