علامہ مصباح یزدیؒ: اہل بیتؑ سے توسل نظام کی بقا اور معاشرے کے تحفظ کی ضمانت ہے

حوزہ نیوز ایجنسی کی رپورٹ کے مطابق، مرحوم علامہ محمد تقی مصباح یزدیؒ نے اہل بیت علیہم السلام سے مسلسل توسل کی اہمیت پر زور دیتے ہوئے کہا کہ مومنین اپنے ہر فیصلے اور اقدام میں حضرت ولی عصر امام مہدی عجل اللہ تعالیٰ فرجہ الشریف کی طرف توجہ رکھیں اور اپنی ذمہ داری ادا کرنے کے ساتھ ایمان، نظام اور معاشرے کے تحفظ کے لیے اہل بیت علیہم السلام کا دامن تھامے رکھیں۔

انہوں نے کہا کہ انسان کو درپیش خطرات سے محفوظ رکھنے والی اہم چیز اہل بیت علیہم السلام سے مسلسل توسل ہے۔ انسان جب بھی کوئی قدم اٹھائے، پہلے حضرت ولی عصر عجل اللہ تعالیٰ فرجہ الشریف کی بارگاہ میں توجہ کرے اور عرض کرے: ’’مولا! میں آپ کی خدمت کے لیے قدم اٹھا رہا ہوں، آپ خود مدد فرمائیں تاکہ وہی ہو جس میں آپ مصلحت سمجھتے ہیں۔‘‘

علامہ مصباح یزدیؒ نے وضاحت کی کہ ہم اپنی ذمہ داری سمجھ کر کام کرنے کی کوشش کرتے ہیں، لیکن ہمیں ہمیشہ حقیقی مصلحت کا علم نہیں ہوتا۔ اس لیے اپنے دل، ایمان اور اعمال کو اہل بیت علیہم السلام کے سپرد کرنا چاہیے اور ان سے دعا کرنی چاہیے کہ وہ ہمارا ہاتھ تھامے رکھیں اور ہمیں لغزش سے محفوظ فرمائیں۔

انہوں نے افسوس کا اظہار کیا کہ بعض اوقات ہم دوسروں کو ذاتی مشکلات میں توسل کی تلقین کرتے ہیں، لیکن ملک اور معاشرے کے اہم مسائل میں اس روحانی وسیلے کو بھول جاتے ہیں۔ انہوں نے مؤمنین کو زیارت عاشورا کی پابندی، حضرت سیدالشہداء علیہ السلام کی یاد میں اطعام اور اہل بیت علیہم السلام، خصوصاً امام حسین علیہ السلام سے محبت و وابستگی کو اپنی زندگی کا حصہ بنانے کی تاکید کی۔

علامہ مصباح یزدیؒ نے کہا کہ یہی وابستگی اسلامی نظام کی بقا، معاشرے کی ترقی اور شیطانی راستوں سے محفوظ رہنے کا اہم ذریعہ ہے۔ انہوں نے دعا کی کہ خدا کبھی ایسا وقت نہ لائے کہ انسان کا دامن اہل بیت علیہم السلام، خصوصاً امام حسین علیہ السلام سے چھوٹ جائے۔

ماخذ: علامہ مصباح یزدیؒ کے بیانات، 26 دی 1390۔