حوزہ نیوز ایجنسی کی رپورٹ کے مطابق، آیت اللہ العظمیٰ حافظ شیخ بشیر حسین نجفی نے نجف اشرف میں اپنے مرکزی دفتر میں اسلامی جمہوریہ ایران کے اعلیٰ سطحی وفد کا استقبال کیا۔ وفد کی قیادت رہبر اسلامی جمہوریہ ایران کے نمائندے، مجلس خبرگان کے نائب سربراہ اور مجلس کے بعض ارکان کر رہے تھے۔
وفد نے رہبر اسلامی جمہوریہ ایران کی جانب سے آیت اللہ العظمیٰ حافظ بشیر حسین نجفی اور نجف اشرف کی مرجعیت کے لیے خصوصی پیغام پہنچایا۔ پیغام میں ایرانی عوام کی حمایت میں مرجعیت کے مؤقف کو سراہتے ہوئے شکریہ اور قدردانی کا اظہار کیا گیا، بالخصوص اسلامی جمہوریہ ایران کو درپیش حالیہ حالات کے دوران۔
وفد نے آیت اللہ العظمیٰ حافظ بشیر حسین نجفی کے مؤقف کو قدر و منزلت کی نگاہ سے دیکھتے ہوئے عراق میں شہید آیت اللہ العظمیٰ سید علی حسینی خامنہ ای کی تشییع جنازہ کے حوالے سے ان کے موقف کو بھی سراہا۔ وفد نے عراقی عوام کے مختلف مذہبی، قومی اور قبائلی طبقات کی جانب سے اظہارِ ہمدردی، یکجہتی اور وفاداری پر بھی قدردانی کا اظہار کیا۔
آیت اللہ العظمیٰ حافظ بشیر حسین نجفی نے اپنی جانب سے فقیدِ امت اسلامیہ کی شہادت پر حضرت امام زمانہ، حاضرین اور اپنی ذات کی جانب سے دوبارہ تعزیت پیش کی۔ انہوں نے مراسمِ تشییع کے دوران عراقی قبائل اور عوام کی جانب سے اختیار کیے گئے عظیم انسانی اور دینی موقف پر ان کا تہہ دل سے شکریہ ادا کیا۔
ملاقات کے اختتام پر آیت اللہ العظمیٰ حافظ بشیر حسین نجفی نے بارگاہِ الٰہی میں دعا کی کہ اللہ تعالیٰ تمام مؤمنین کو ہر قسم کی برائی اور آفات سے محفوظ رکھے اور ہمارے مولا و آقا حضرت صاحب العصر والزمان امام مہدی عجل اللہ تعالیٰ فرجہ الشریف کے ظہور میں تعجیل فرمائے۔
آپ کا تبصرہ