حوزہ نیوز ایجنسی کی رپورٹ کے مطابق، آیت اللہ العظمیٰ الحاج حافظ بشیر حسین نجفی کے مرکزی دفتر نجف اشرف کے ایک وفد نے اسلامی جمہوریہ ایران کے مقدس شہر قم میں حوزہ نیوز ایجنسی کے دفتر کا دورہ کیا۔
وفد میں دفتر آیت اللہ العظمی بشیر نجفی کے شعبہ وکالات الخارجیہ و تعلقات عامہ کے نمائندے حجۃ الاسلام سید ضامن جعفری اور حجۃالاسلام سید مراد جعفری شامل تھے۔ انہوں نے آیت اللہ العظمی شیخ بشیر حسین نجفی کے دفتر کی جانب سے حوزہ نیوز ایجنسی کے سربراہ اور عملے کو سلام اور مبارکباد پیش کی اور اس نیوز ایجنسی کو حوزہ علمیہ کا دنیا سے رابطے کا ایک مؤثر ذریعہ قرار دیا۔
دورے کے دوران وفد کو نیوز ایجنسی کی اہم سرگرمیوں اور ذمہ داریوں سے آگاہ کیا گیا۔ وفد نے حوزہ علمیہ کے بزرگ مراجع کرام اور ان کے اداروں کی خدمات پر روشنی ڈالنے کے لیے حوزہ نیوز کی کوششوں کو سراہا اور اس کے معاشرتی خدمات میں کردار کو اہم قرار دیا۔
اجتماع میں باہمی تعاون پر اتفاق کیا گیا تاکہ عوامی مفاد کی بہتر خدمت ہوسکے اور سچائی پر مبنی خبروں کی نشر و اشاعت کے ذریعے مثبت اثرات مرتب کیے جائیں۔ اس موقع پر میڈیا کی ذمہ داری اور اس کی اہمیت پر بھی زور دیا گیا۔
واضح رہے کہ حوزہ نیوز ایجنسی فی الحال اپنی خبریں آٹھ مختلف زبانوں میں شائع کرتی ہے اور مراجع عظام کے دفاتر، حوزہ علمیہ اور دینی اداروں کی خبروں اور سرگرمیوں کو کئی سالوں سے مؤثر انداز میں پیش کر رہی ہے۔
آپ کا تبصرہ