امام حسن عسکری علیہ السلام کی سیرت سے رہنمائی حاصل کر کے مسائل سے نجات ممکن ہے

حوزہ نیوز ایجنسی کی رپورٹ کے مطابق، قائد ملت جعفریہ پاکستان علامہ ساجد نقوی نے 8 ربیع الثَّانِی امام حسن عسکری علیہ السلام کے یوم ولادت پر جاری اپنے پیغام میں کہا: امام حسن عسکری علیہ السلام نے ہر قسم کے دباؤ اور حکمرانوں کی سخت نگرانی کے باوجود دین اسلام کی حفاظت اور اسلام مخالف نظریات کا مقابلہ کرنے کے لیے مختلف نوعیت کے اقدامات انجام دیے اور اسلام مخالف اقدامات کو بے اثر کر دیا۔
انہوں نے کہا: اگرچہ امام حسن عسکری علیہ السلام کے دور میں حالات کی ناسازگاری اور حکومت کی جانب سے عائد کڑی پابندیوں کے باعث آپ معاشرے میں اپنے وسیع علم کو فروغ نہیں دے سکتے تھے، تاہم ان تمام پابندیوں کے باوجود ایسے شاگردوں کی تربیت فرمائی جن میں سے ہر ایک نے اپنے طور پر معارفِ اسلام کی اشاعت و فروغ اور معاشرے کی اصلاح میں اہم کردار ادا کیا۔ آپ کے شاگردوں میں احمد بن اسحاق قمی، عثمان بن سعید اور علی بن جعفر جیسے جلیل القدر افراد شامل ہیں۔
علامہ ساجد نقوی نے کہا: جب بھی مشکلات اور مسائل پیش آتے تو امام حسن عسکری علیہ السلام اپنے علمِ امامت اور حیرت انگیز تدبیر کے ذریعے سخت ترین مشکلات کو حل فرما دیتے تھے۔
قائد ملت جعفریہ پاکستان نے کہا: جب انسانی معاشروں میں ناانصافی، بے عدلی، تشدد اور برائیوں کا رواج ہوتا ہے تو لوگ ایک ایسے مسیحا کے منتظر ہوتے ہیں جو انہیں مشکلات سے نکالے، ظلم کا خاتمہ کرے، معاشرے کو تمام برائیوں سے پاک کرے اور ایک پُرامن، صالح اور نیکی پر مبنی معاشرہ قائم کرے۔
انہوں نے کہا: امام حسن عسکری علیہ السلام کی عظمت و بزرگی کا ایک پہلو یہ بھی ہے کہ پوری کائنات جس مسیحا کی منتظر ہے، وہ انہی کے فرزند صالح حضرت امام مہدی علیہ السلام ہیں۔
علامہ سید ساجد علی نقوی نے زور دیتے ہوئے کہا: دورِ حاضر میں دنیائے انسانیت کو بالعموم اور عالم اسلام کو بالخصوص جن بحرانوں اور چیلنجز کا سامنا ہے اور انسانی معاشرے جس گراوٹ کا شکار ہوچکے ہیں، ان حالات میں انسانوں کو ہدایت اور پیشوائی کی ضرورت ہے۔ یہ ہدایت اور پیشوائی حضرت امام حسن عسکری علیہ السلام کی سیرت کا مطالعہ کرکے اور اس پر عمل کرکے حاصل کی جاسکتی ہے۔
انہوں نے کہا: ہمیں چاہیے کہ امام حسن عسکری علیہ السلام کی سیرت پر عمل کرتے ہوئے انسانیت کو مسائل سے نجات دلانے کے لیے اپنا انفرادی و اجتماعی کردار ادا کریں، حقیقی اسلامی و جمہوری نظام رائج کریں اور عدل و انصاف سے مزین معاشرے تشکیل دیں۔