"سیدِ مقاومت" کا لازوال ورثہ؛ آج بھی نظامِ استکبار کی آنکھوں میں کانٹا

حوزہ نیوز ایجنسی کی رپورٹ کے مطابق، سید حسن نصراللہ (ره) کی شہادت کو دو برس گزرنے کے باوجود ان کی زندگی، مجاہدانہ جدوجہد اور فکری میراث پر مختلف تجزیے، دستاویزی فلمیں اور مطالعات سامنے آ رہے ہیں، جو اس امر کی نشاندہی کرتے ہیں کہ ان کی شخصیت اور سیاسی و سماجی کردار خطے کی معاصر تاریخ میں نمایاں اہمیت رکھتا ہے۔

حزب اللہ محض ایک عسکری تنظیم نہیں

رپورٹ کے مطابق مغربی اور اسرائیلی مطالعاتی اداروں کی بعض تجزیاتی رپورٹس میں بھی اس امر کی نشاندہی کی گئی ہے کہ حزب اللہ کو محض اس کے عسکری ڈھانچے، میزائل ذخائر یا اعلیٰ قیادت کی شخصیات تک محدود کرکے نہیں دیکھا جاسکتا۔ شہید نصراللہ (ره) کی طویل قیادت کے دوران حزب اللہ لبنان کے سیاسی، سماجی اور معاشرتی ڈھانچے میں گہری جڑیں قائم کرچکی تھی۔

رپورٹ میں اسرائیلی انسٹی ٹیوٹ فار نیشنل سکیورٹی اسٹڈیز (INSS) کے حوالے سے بیان کیا گیا ہے کہ نصراللہ (ره) کی میراث ایک عسکری تنظیم سے کہیں وسیع ہے اور اس میں سیاسی، سماجی و اقتصادی روابط کا ایک پیچیدہ نظام شامل ہے۔ رپورٹ کے مطابق حزب اللہ کی سماجی بنیاد اور اس کے مختلف طبقات سے روابط محض قیادت کی تبدیلی سے ختم نہیں ہوتے۔

شہید نصراللہ (ره) کی شخصیت پر دستاویزی فلمیں

رپورٹ میں بتایا گیا ہے کہ گزشتہ برسوں بالخصوص شہید سید حسن نصراللہ (ره) کی شہادت کے بعد، ان کی زندگی، شخصیت، سیاسی جدوجہد اور فکری و سماجی کردار کے مختلف پہلوؤں پر متعدد دستاویزی فلمیں تیار کی گئی ہیں۔

ان میں "معادلہ نصر" نامی پانچ حصوں پر مشتمل دستاویزی سلسلہ بھی شامل ہے، جس میں شہید سید حسن نصراللہ (ره) کے ایک طویل اور خصوصی انٹرویو کے ذریعے ان کے سیاسی و تزویراتی تجربات اور اہم ملاقاتوں و واقعات کے بعض پہلوؤں کو پیش کیا گیا ہے۔

اسی طرح "شمعِ جمع" کے عنوان سے تیار کی گئی دستاویزی فلم میں شہید نصراللہ (ره) کی سماجی و سیاسی زندگی اور لبنان کے مختلف مذہبی و سماجی طبقات کے درمیان اتحاد پیدا کرنے کی کوششوں کا جائزہ لیا گیا ہے۔ رپورٹ کے مطابق اس فلم میں ان کے طرزِ عمل کو موجودہ معاشرتی حالات کے تناظر میں بھی زیرِ بحث لایا گیا ہے۔

ایک انسانی اور خاندانی پہلو

رپورٹ میں "زندگی سید حسن نصراللہ" اور "قلب الأمین" سمیت دیگر دستاویزی کاوشوں کا بھی ذکر کیا گیا ہے۔ ان میں بعض فلموں نے شہید نصراللہ (ره) کی سیاسی و عسکری زندگی کے بجائے ان کے بچپن، تعلیم، خاندانی ماحول، سادہ طرزِ زندگی اور ذاتی شخصیت کے پہلوؤں کو اجاگر کیا ہے۔

خصوصاً "قلب الأمین" میں ان کے والد عبدالکریم نصراللہ کی یادوں اور بیانات کے ذریعہ شہید نصراللہ (ره) کی شخصیت کے ان پہلوؤں کو پیش کیا گیا ہے جو ان کی خاندانی تربیت، دینی ماحول اور شخصی اوصاف سے متعلق ہیں۔

مقاومت کی ایک دیرپا میراث

حوزہ نیوز کی تجزیاتی رپورٹ کے مطابق شہید سید حسن نصراللہ (ره) کی سب سے نمایاں میراث محض ان کی قیادت یا سیاسی و عسکری کردار تک محدود نہیں، بلکہ انہوں نے ایک ایسا اجتماعی و تنظیمی ڈھانچہ تشکیل دیا جو ان کی شہادت کے بعد بھی اپنا اثر برقرار رکھے ہوئے ہے۔

رپورٹ میں شہید نصراللہ (ره) کو مقاومت کی ایسی شخصیت کے طور پر پیش کیا گیا ہے جن کی فکر، جدوجہد اور قائم کردہ سیاسی و سماجی روابط آج بھی زیرِ مطالعہ ہیں اور جن کی میراث خطے کی سیاست اور مزاحمتی تحریکوں کے تناظر میں اہم موضوع کی حیثیت رکھتی ہے۔