حوزہ نیوز ایجنسی کی رپورٹ کے مطابق، آیت اللہ حائری شیرازیؒ نے کہا کہ حقیقی تربیت کا مطلب یہ ہے کہ انسان کی فطری صلاحیتوں کو آزاد ہونے کا موقع دیا جائے۔ کسی بچے پر مختلف باتیں مسلط کرنا یا اس سے وقت سے پہلے کسی خاص طرزِ عمل کی توقع رکھنا حقیقی تربیت نہیں ہے۔
انہوں نے بچوں کی فطرت کو پھول سے تشبیہ دیتے ہوئے کہا کہ اگر کسی پھول کو زبردستی کھولا جائے تو وہ خراب ہوجاتا ہے۔ اسی طرح بچے کی شخصیت بھی نازک ہوتی ہے اور والدین کی حد سے زیادہ مداخلت اس کی فطری نشوونما کو متاثر کرسکتی ہے۔
آیت اللہ حائری شیرازیؒ نے والدین کو مخاطب کرتے ہوئے کہا کہ بچوں کے معاملات میں بہت زیادہ مداخلت نہ کریں، انہیں بار بار نصیحت نہ کریں اور ان کے ہر کام پر مسلسل نظر نہ رکھیں۔ اگر نگرانی ضروری ہو تو دور سے کریں، تاکہ بچے کو یہ احساس نہ ہو کہ ہر وقت اس کی نگرانی کی جا رہی ہے۔
انہوں نے کہا کہ بچوں میں اگر کوئی معمولی کمی یا غلطی نظر آئے تو ضروری نہیں کہ والدین اسی وقت اسے ختم کرنے کے لیے مسلسل دباؤ ڈالیں۔ تربیت میں صبر اور تدریج کو ملحوظ رکھنا چاہیے۔
انہوں نے خبردار کیا کہ بچوں کو ہر وقت بہت زیادہ مؤدب بنانے کی کوشش بھی نقصان دہ ہوسکتی ہے، کیونکہ مسلسل دباؤ کے نتیجے میں بچے اپنی حقیقی کیفیت چھپانا، جھوٹ بولنا اور صرف دوسروں کو خوش کرنے کے لیے ظاہری طور پر اچھا بننے کی کوشش کرنا سیکھ سکتے ہیں۔
آیت اللہ حائری شیرازیؒ کے مطابق، بچوں کی تربیت کا بنیادی مقصد ان کی فطری صلاحیتوں کو دبانا نہیں بلکہ رکاوٹوں کو دور کرکے انہیں فطری طور پر نشوونما پانے کا موقع دینا ہے۔
ماخذ: کتاب ’’راہِ رشد‘‘، جلد چہارم، صفحہ 207
آپ کا تبصرہ