حوزہ نیوز ایجنسی کی رپورٹ کے مطابق، حوزہ علمیہ ہرمزگان کے حوزات علمیہ کے سربراہان نے حوزہ علمیہ ایران کی سپریم کونسل کے سیکریٹری آیت اللہ محمد مہدی شبزندهدار سے ملاقات کی۔ اس موقع پر انہوں نے کہا کہ ہرمزگان جیسے خصوصی حالات والے علاقے میں دینی خدمات انجام دینا ’’افضل الاعمال احمزها‘‘ کے مصداق ہے۔
آیت اللہ شبزندهدار نے ’’احسن عملاً‘‘ کی تشریح کرتے ہوئے کہا کہ انسان کو اپنی زندگی کے ہر فیصلے اور عمل میں پوری کوشش کرنی چاہیے کہ وہ اللہ تعالیٰ کی نظر میں بہترین عمل انجام دینے والوں میں شامل ہو۔ امام صادق علیہ السلام کی ایک روایت کا حوالہ دیتے ہوئے انہوں نے کہا کہ ’’احسن عملاً‘‘ کا معیار صرف اعمال کی کثرت نہیں، بلکہ یہ ہے کہ انسان اپنے اعمال میں دینی اور اخلاقی اقدار سے کس قدر وابستہ ہے۔
انہوں نے ’’احسن عملاً‘‘ کے بنیادی ارکان میں اللہ تعالیٰ کی خشیت اور قربِ الٰہی کے لیے نیک نیت کو قرار دیا اور کہا کہ خوف اور خشیت میں فرق ہے؛ خوف عذابِ الٰہی کا اندیشہ ہے، جبکہ خشیت اللہ تعالیٰ کی معرفت اور اس کی عظمت کے ادراک سے پیدا ہونے والی کیفیت ہے۔
اساتذہ سے خطاب کرتے ہوئے آیت اللہ شبزندهدار نے کہا کہ اگر کوئی استاد ’’احسن عملاً‘‘ بننا چاہتا ہے تو اسے طلبہ کا خیرخواہ ہونا چاہیے، باقاعدگی سے مطالعہ کرنا، مطالب کو اچھی طرح منتقل کرنا، وقت کی پابندی اور معنویت کو اپنی زندگی کا حصہ بنانا چاہیے۔ انہوں نے کہا کہ استاد کی معنویت سے طلبہ نہ صرف علمی طور پر استفادہ کرتے ہیں بلکہ اس کے روحانی اثرات سے بھی فائدہ اٹھاتے ہیں۔
انہوں نے مرحوم آیت اللہ العظمیٰ سید موسیٰ شبیری زنجانی کی علمی پختگی، تواضع اور فروتنی کو بھی خراجِ تحسین پیش کیا اور ان کے انتقال کو ایک بڑا علمی نقصان قرار دیا۔
آیت اللہ شبزندهدار نے انقلاب اسلامی کے بانی امام خمینی اور شہید رہبرِ انقلاب کی نمایاں خصوصیت اخلاص کو قرار دیتے ہوئے کہا کہ انقلاب اسلامی کی کامیابی اسی اخلاص کا نتیجہ ہے اور اسی اخلاص نے انقلاب کو دشمنوں کی پیدا کردہ مشکلات کے مقابلے میں استقامت عطا کی۔
اس موقع پر حوزہ علمیہ ہرمزگان کے مدیر حجۃ الاسلام والمسلمین نادر حقیقی نے صوبے کے 13 فعال مدارس کی کارکردگی، تخصصی شعبوں اور تبلیغی سرگرمیوں کی رپورٹ پیش کی۔ انہوں نے بتایا کہ صوبے میں تقریباً 900 مبلغین مختلف تبلیغی منصوبوں میں سرگرم ہیں، جن میں تقریباً 450 مبلغین ’’امین‘‘ منصوبے سے وابستہ ہیں۔ انہوں نے مہنگائی اور رہائشی مسائل سمیت صوبے کے دینی طبقے کو درپیش مشکلات کی طرف بھی توجہ دلائی۔
آپ کا تبصرہ