حوزہ نیوز ایجنسی کی رپورٹ کے مطابق، متحدہ عرب امارات کے شہر دبئی میں آئندہ برس دیوالی تک نیا ہندو مندر کھلنے کی اطلاعات ہیں۔خلیج ٹائمز کے مطابق، یہ مندر جو دبئی کے ميناء جبل علی میں واقع ہے، سندھی گورو دربار مندر کی توسیع ہے جو متحدہ عرب امارات کے قدیم ترین ہندو مندروں میں سے ایک ہے۔
دبئی میں آئندہ برس دیوالی تک مندر کھلنے کا امکان
راجو شراف جو سندھی گورو دربار مندر کے ٹرسٹی ہیں، انہوں نے کہا کہ اس مندر کے فن تعمیر میں عرب ممالک سے متلعق ڈیکوریٹو چیزیں ہونگی اور یہ 11 ہندو دیوتاؤں کا گھر ہوگا۔ انہوں نے کہا کہ مندر ابھی زیر تعمیر ہے۔
خلیج ٹائمز کے حوالے سے راجو شراف نے کہا کہ 'ابھی تک مندر کے بیسمینٹ اور اس سے اوپری منزل کا کام مکمل ہوچکا ہے۔ ہم اسے دیوالی سنہ 2022 کے موقع پر کھولنے کا منصوبہ طے کر رہے ہیں۔'
راجو شراف نے مزید کہا کہ 'اس مندر کی بنیاد فروری سنہ 2020 میں رکھی گئی تھی'۔ ایک بار مکمل ہونے کے بعد اس علاقے میں کئی چرچ، سکھ گرو نانک دربار اور کئی ہندو مندر تعمیر ہوں گے۔
راجو نے کہا کہ 'ہم مقامی معیشت کو مضبوط کرنا چاہتے ہیں اور ہم اس کے پیچھے حکومت کے شکر گزار ہیں جس نے مذہب سے بالاتر ہوکر ہمیں بھر پور تعاون فراہم کیا'۔
آخر میں انہوں نے کہا کہ زائرین ثقافتی تقریبات، مذہبی اجتماعات اور دیگر اجتماعی تقریبات کے لیے بینکٹ ہال کا استعمال کرسکیں گے۔
