حوزہ نیوز ایجنسیl
منظوم ترجمہ:حجۃ الاسلام والمسلمین مولانا سلمان عابدی
عہد نامہ مالک اشتر، من جملہ ان مکتوبات میں سے ہے جسے امام علی(ع) نے مالک اشتر کو مصر کی گونری پر منصوب کرنے کے بعد انہیں حکمرانی کے آداب و اصول کی طرف متوجہ کرتے ہوئے تحریر فرمایا ہے،یہ عہدنامہ، امام علی(ع) سے منسوب مفصل ترین مکتوبات میں سے ایک ہے اور دنیا کی کئی زندہ زبانوں میں اس کا ترجمہ اور شرح منظر عام پر ہے،البتہ اردو زبان کا دامن اسکے منظوم ترجمے سے خالی تھا لیکن بحمد اللہ نہج البلاغہ کا مکمل منظوم ترجمہ اور ساتھ ہی عہد نامہ مالک اشتر کا منظوم ترجمہ شاعر و خطیب، ادیب و محقق حجۃ الاسلام والمسلمین مولانا سلمان عابدی کے رشحات قلم اور فکر رسا کا انمول شاہکار بن کر ہمارے سامنے ہے جسے یہاں قسط وار پیش کیا جاتا ہے۔
    قسط دوازدہم

"نماز جماعت"

نمازِ   با   جماعت   کو   جو   سب   تیار   ہو جائیں
تو ایسی مت پڑھانا جس سے سب  بیزار  ہو جائیں

نہ   ہی   ایسی   پڑھانا   تم   کہ   وہ  برباد  ہوجائے
(اور   اپنی   کیفیت   کے   خول   سے   آزاد  ہوجائے)

کہ دیکھو لوگوں میں کچھ لوگ تو  بیمار  ہوتے  ہیں
اور ایسے بھی کسی حاجت سے جو دوچار ہوتے ہیں

یمن کی سمت جب مجھ کو  رسول اللہ  نے  بھیجا
کہا  میں  نے  نماز  اُن  کو  پڑھاوں  کس  طرح  آقا ؟

تو   فرمایا   نماز   ایسی   پڑھاو   اے   علی   ان   کو
کہ  جو  سب  سے  ذیادہ  ناتواں  انساں  کی  ہوتی ہو

پھر اٍسکے بعد اِس کا بھی رہے کچھ ہوش  اے  مالک
رعایا   سے   نہ   رہنا   دیر   تک   روپوش   اے  مالک

کہ   حاکم   کا   رعایا   کی   نگاہوں   سے   چھپا  رہنا
دلوں   میں  کرتا  ہے  دیکھو  اے  مالک  تنگیاں   پیدا

اور  اُن  کی حالتوں  سے   واقفیت  بھی  نہیں  ہوتی
یہ روپوشی اُنہیں بھی علم سے اُن سب کے روکے گی

کہ جن  پر پڑ چکے ہیں  پردے جو  مستور  ہیں  مالک
رعایا  کی   نگاہوں  سے  جو  چیزیں  دور  ہیں  مالک

نگہ   کے   زاوئے   ہی   کو   بدل   دے گی یہ روپوشی
بڑی شئ چھوٹی  ہوجائے گی چھوٹی  شئ  بڑی ہوگی

بدل  جاتا  ہے  حسن  و  قبح  کا  معیار  لوگوں  میں
اور حق مخلو ط ہو جاتا ہے باطل  سے نگاہوں   میں

اور حاکم  بھی بالآخر اک بشر  ہوتا  ہے اس کو  بھی
نہیں   ہوتی   کسی   بھی  امرِ  پوشیدہ   سے  آگاہی

نہ  پیشانی پہ حق  کے  ہوتے  ہیں  مالک  نشاں  ایسے
کہ سچ کو جھوٹ سے کر کے الگ پہچانیں ہم جن سے

پھر  اس  کے  بعد  تم  دو  ہی  طرح  کے  آدمی ہو گے
( جہاں  پر   تیسری   صورت  کا  ہونا  غیر ممکن  ہے)

یا ایسے شخص ہوگے نفس حق کی راہ میں جس کا
عطا  و  بذل   و   بخشش  کے  لئے   رہتا   ہے   آمادہ

تو پھر تم کو ادائے حق میں پردے کی ضرورت  کیا
کریموں سا عمل کرنے میں چھپنے کی ضرورت کیا؟

یا  پھر  تم  مبتلائے  بخل  ہوگے  اور  بہت   جلدی
رعایا   تم  سے  نا  امید  ہوکر  خود  نہ  مانگے  گی

تو پھر مالک تمہیں  روپوش ہونے کی ضرورت  کیا
کسی گوشہ  سے ہم  آغوش ہونے کی ضرورت  کیا ؟

اور اے مالک بہت سی حاجتیں لوگوں کی ہیں ایسی
کہ جن  سے  بار  پڑتا  ہے نہ زحمت  اُن میں ہے کوئی

کہ  جیسے  ظلم  کی  فریاد  " اور  مظلوم  کا  گریہ "
یا  انصاف  و  عدالت  کا  کسی  شئ  میں  طلب کرنا

                              "مصاحبین"

پھر  اِس  کے  بعد  مالک  جان  لو  ہر  ایک  حاکم کے
نہایت  خاص   بے  حد  سر چڑھے  افراد  ہیں   ہوتے

کہ  جو  مطلب  پرست  بیباک  بے  انصاف  ہوتے  ہیں
کہ  جن  کے دل  ترحم  کی  ادا  سے  صاف ہوتے  ہیں

علاج  اِس  کا  کرو  اُن  علّتوں  کو  ختم  تم   کر  کے
کہ جن  کی  وجہ  سے  حالات  پیدا  ہوتے  ہیں  ایسے

اور  اے  مالک  مری  اس  بات  کو  تم  یاد رکھ لینا
کسی  بھی  ہم نشیں  کو  تم کوئی  جاگیر مت دینا

کبھی  تم  سے  کوئی ایسی توقع  بھی نہ وہ  رکھے
کہ  تم اس کو کسی  ایسی زمیں پر قبضہ  دیدوگے

کہ  جس  سے  آبپاشی  یا کسی بھی حصہ داری کے
قضّیہ   میں   شراکت   دار   کو   نقصان    پہنچائے

اور اپنا  بوجھ  اُس پر  ڈال کر  خود  تو مزے  لوٹے
مگر   دھبہ   دوعالم   میں   تمہاری   ذات   پر   آئے

اے مالک دیکھو جسکے سر پہ جو حق عائد ہوتا  ہو
تو    نافذ   کردو   اُس   کو   چاہے   اپنا  ہو پرایا ہو

اور اس کے بارے میں صبر و تحمل والی خو رکھو
خدائے   پاک   سے   اجر  و  صلہ  کی   آرزو   رکھو

اور اس کی زد قریبی لوگوں پر ہی کیوں نہ پڑتی ہو
اور اس میں جو گرانی  بھی  طبیعت  پر گذرتی  ہو

اُسے   برداشت   کرلو   آخرت   کو   سامنے   رکھ کر
نتیجہ   اِس  کا   نکلے  گا   نہایت  خوب   اور  بہتر

تمہارے   بارے   میں   گر   بدگمانی  ہو  رعیت  کو
کہ   تم   نے  ظلم  ڈھایا  یا روا رکھا   مصیبت   کو

تو   اپنے   عذر   کا  اظہار  واضح  طور  سے  کر کے
بدل   دو   اُن  کے  ذہنوں  کو ، نکالو  بد گمانی  سے

کہ  اِس  سے تربیت  کا  نفس  کی سامان  بھی  ہوگا