۲۴ تیر ۱۴۰۳ |۷ محرم ۱۴۴۶ | Jul 14, 2024
ثاقب

حوزہ؍بزم استعارہ (قم المقدسہ) کی ہفتہ وار شعری و تنقیدی نشست میں پیش کی گئی تازہ نعت رسول کریم صلی اللہ علیہ وآلہ وسلم:میں نعت لکھ کے پہنچتا ہوں روبروئے رسولؐ،سو حرف حرف سناتا ہے گفتگوئے رسولؐ،یہ واردات سحر کے قریب پیش آئی،چُرا کے لے گئے سارے گلاب بُوئے رسولؐ۔

حوزہ نیوز ایجنسی؍

گفتگوئے رسولؐ [نعت]

بزم استعارہ (قم المقدسہ) کی ہفتہ وار شعری و تنقیدی نشست میں پیش کی گئی تازہ نعت رسول کریم صلی اللہ علیہ وآلہ وسلم:
۔۔۔۔۔۔۔۔۔۔۔۔۔۔۔۔۔۔

میں نعت لکھ کے پہنچتا ہوں روبروئے رسولؐ
سو حرف حرف سناتا ہے گفتگوئے رسولؐ

سنبھالے رکھتی ہے وَ الْفَجْر حُسنِ روئے رسولؐ
اٹھائے رکھتی ہے وَ اللَّیْل تارِ موئے رسولؐ

یہ واردات سحر کے قریب پیش آئی
چُرا کے لے گئے سارے گلاب بُوئے رسولؐ

بھٹکتا رہتا ہے غفلت کی دھند میں ورنہ
ہر اک ضمیر کو رہتی ہے جستجوئے رسولؐ

جدھر نگاہ اٹھائی وہی نظر آئے
یہ چارسُو ہیں حقیقت میں چارسوئے رسولؐ

کوئی علیؑ کوئی سلماںؓ کوئی بلالؓ بنا
عجیب رنگ دکھاتی ہے آرزوئے رسولؐ

اُٹھا کے سات سمندر بنا دیے اُس سے
گرا ہوا تھا کہیں قطرۂ وضوئے رسولؐ

یہ ظلم و جور کی بدصورتی فنا ہو گی
جب اس جہان میں آئے گا خوبروئے رسولؐ

ہمارے اشک کبھی بھی نہ رُک سکے، ثاقبؔ!
کہ بہہ رہی مسلسل یہ آبجوئے رسولؐ

۔۔۔۔۔۔۔۔۔۔۔۔۔۔۔
عباس ثاقبؔ

لیبلز

تبصرہ ارسال

You are replying to: .