حوزہ نیوز ایجنسی کی رپورٹ کے مطابق،ایرانی سپریم نیشنل ڈیفنس یونیورسٹی (SNDU) کا ایک اعلیٰ سطحی وفد ایران اور ہندوستان کے دفاعی اداروں کے درمیان تعلیمی اور تحقیقی تعاون کو بڑھانے کے لیے ہندوستان کے دورے پر ہے۔

ایس این ڈی یو کے چیف بریگیڈیئر جنرل ڈاکٹر اسماعیل احمدی مقدم کی قیادت میں وفد نے نیشنل ڈیفنس کالج آف انڈیا کے حکام سے ملاقات کی۔

نیشنل ڈیفنس کالج آف انڈیا سینئر دفاعی اور سول سروس افسران کو تربیت دینے کے لیے دنیا کے اعلیٰ اداروں میں سے ایک ہے۔

ملاقات کے دوران فریقین نے متعدد موضوعات پر تبادلہ خیال کیا اور مشترکہ مفادات کے پیش نظر تعاون بڑھانے پر اتفاق کیا جس میں مشترکہ سائنسی اور تعلیمی تحقیق کے ساتھ ساتھ طلباء اور فیکلٹی کے تبادلے بھی شامل ہیں۔

ایس این ڈی یو کے وفد نے انڈیا کے سینٹر فار سٹریٹیجک اسٹڈیز کا بھی دورہ کیا، جہاں احمدی مقدم نے یوکرین جنگ اور دیگر عالمی مسائل پر تقریر بھی کی۔

اس کے علاوہ، ایرانی وفد نے انڈین ایئر فورس کالج فار اسٹریٹجک اسٹڈیز کا بھی دورہ کیا، جہاں انہوں نے عالمی اور علاقائی مسائل اور باہمی تعاون جیسے موضوعات پر پروفیسرز اور طلباء کے ساتھ بات چیت کی۔