تحریر: مزمل حسین علیمی آسامی

حوزہ نیوز ایجنسی I آج مدارس اسلامیہ میں طلبہ کو مختلف علوم و فنون سکھائے جاتے ہیں۔ لیکن دیکھا یہ جاتا ہے کہ اکثر طلبہ تکمیل درس نظامی کے بعد بھی کسی ایک فن میں کامل عبور اور مہارت تامہ حاصل نہیں کر پاتے۔ سبب یہ ہے کہ ان کی سمت متعین نہیں ہوتی ہے کہ انہیں اپنے مستقبل میں کرنا کیا ہے؟ اور کس فن کو لے کر آگے بڑھنا ہے؟ ان کا تعلیمی سفر تو مکمل ہو جاتا ہے، لیکن انہیں منزل نہیں مل پاتی ہے۔ مثال کے طور پر اگر منزل متعین کیئے بغیر کسی راستے پر ہم چل پڑیں اور چلتے رہیں، ہم لاکھ مشقتیں اور پریشانیاں برداشت کر لیں تب بھی منزل نہیں پاسکتے۔ کیوں کہ راستہ چلنے کے ساتھ ہم نے منزل متعین نہیں کی۔ وہ سب سمت متعین کیے بغیر اپنے تعلیمی سفر پر گامزن ہوتے ہیں۔

نظام کائنات میں قدرت نے ہر ایک جان کو یکساں صلاحیت کا مالک نہیں بنایا ہے۔ اگر سب یکساں ہو جائے تو کائنات کا نظام درہم برہم ہو جائے گا۔ ہر ایک طالب علم مفتی نہیں بن سکتا، ہر ایک محدث نہیں بن سکتا، ہر ایک فقیہ عصر نہیں بن سکتا، ہر ایک مجدد زماں نہیں بن سکتا۔ حاصل یہ ہے کہ ہر ایک کی صلاحیتیں اور خوبیاں ایک دوسرے سے مختلف ہیں۔ آپ کا مستقبل کیا ہوگا؟ یہ آپ کا حال طے کرتا ہے۔ حال میں کس میدان میں آپ کی دل چسپی اور اس پر محنتیں جاری ہیں، وہ آپ کے مستقبل پر اثر انداز ہوں گے۔ حال کو بہتر بنائیے مستقبل خود بہ خود بہتر ہوتا جائے گا۔

حال میں آپ کو یہ طے کرنا ہوگا کہ آپ اپنے مستقبل میں کیا بننا چاہتے ہیں۔ روشن مستقبل کے لیے حال میں درست سمت کا تعین اور محنتیں جاری رکھنا لازمی ہے۔

درس نظامی کا جو نظام تعلیم ہے، وہ ایک شاندار اور جامع نصاب ہے۔ تاہم زمانے کے مطابق منہج میں تبدیلی بھی مطلوب ہے۔ درس نظامی کے نظام تعلیم میں بہت سے فنون پڑھائے جاتے ہیں۔ ان میں جس فن سے آپ کو دلچسپی ہے اس میں بھر پور محنت کریں۔ اس فن سے متعلق کسی ماہر استاذ کو اپنا آئیڈیل بنائیں اور ان سے مشورے لیتے رہیں۔ ان کی قربت اختیار کریں تاکہ آپ ان سے استفادہ کر سکیں ۔ اساتذہ کو چاہیے کہ وہ دیکھیں کہ کس طالب علم میں کس طرح کی صلاحیت و لیاقت موجود ہے۔ کس کو کس فن سے دل چسپی ہے۔ کس فن کے بارے میں کس کا نظریہ کیا ہے۔ کون سا فن کس کے مزاج کے مطابق ہے، استاذ اس فن میں اس کی رہنمائی کرے۔ طلبہ میں کامیابی کا ہنر پیدا کرنے کے لیے انکی نفسیات کا پڑھنا اور سمجھنا از حد ضروری ہے۔

خود کو حقیر و کمتر گمان کرنے سے بچیں۔ ہر انسان اپنے مقام پر افضل ہے۔ کیوں کہ رب تعالیٰ نے ہمیں بے کار پیدا نہیں فرمایا ”محسبتم انما خلقتم عبثا“ جب خالق حقیقی نے ہمارے کارآمد ہونے کا اعلان فرمایا ہے، تو ہمیں اس قدر گھبرانے کی ضرورت نہیں ہے۔ ہمارا کام محنت کرناہے، اور کامیابی سے نوازنا ہمارے رب کا کام - ”السعی منی والا تمام من اللہ“ کا فلسفہ یہی ہے۔ ضرورت اس بات کی کی ہے کہ ہم درست سمت کا تعین کریں اور دل جمعی کے ساتھ محنتیں جاری رکھیں۔ اگر ہم نے ایسا کر دیا تو یقین مانیں کامیابی ہمارا مقدر ہوگی۔